Emery hmaah United an mualpho

Arsenal boss hlui Unai Emery-a'n Villarreal kalsanin, Aston Villa a pan a, Steven Gerrard bantu club a enkawl hmasak berah Manchester United hmachhawn nghal mah se harsatna a tawk lo - Erik ten Hag-a hnuaia harhtharna chang United an insiamṭha mek tih a hre ve lo a, 3-1 in Red Devils an sawp!

Kum 1995 hnua Villa Park-a United la hneh lo Aston Villa hian minute 11 chhungin goal hnih an khung - Leon Bailey chuan minute sarihna lekah goal hmahruai a khung a, minute li hnu lawkah Lucas Digne chuan a belhchhah zui.

United-in rin loh takin goal hnih an chhuah nghal a, Red Devils player-te an hawihai - Alejandro Garnacho chuan mikhual team tan chance nei ve mah se Emi Martinez chuan ṭha zetin a dang a, Ten Hag-a hnuaia a vawi khat nana captain armband hrengtu Cristiano Ronaldo hun ṭha neih pawh Martinez hian a dansak.

Minute 45-naah erawh United-in goal an khung ta nge nge a, Luke Shaw-a shot chuan Jacob Ramsey perin Villa goal-ah a lut a, vanneih goal a ni - hei hi minute 90 chhunga United fans thawm rin lai ber a ni zui.

Second half ṭan aṭanga minute lina lekah Ollie Watkins-a siamsak chu Ramsey chuan goal-ah a chantir a, hun tawp thlenga goal dang lut loin Villa an chak.

Villa boss Emery chuan, "Minute 90 chhung kan khelh dan thlirin lawm tur kan ni a, mahse, hei hi a bul ṭanna chauh a nih avangin hmasawn zel turin tih tur tam tak kan la nei a ni," a ti.

United manager Ten Hag chuan, "Keini aiin an inpeih a, an tha tho zawk bawk a, kha aia hriam tur kan ni. Result-ah kan dinhmun a chiang a, zaninah kan khel ṭha tawk lo a ni," a ti a, chak loh a pawm.