Venghnuai an pui, Chanmari an zawr

Honda MPL9-ah FC Venghnuaiin semifinal khelh phak ngei an tum tih lantir nan nimin chhun khan Chanmari FC 6-1 in an sawp. RG Stadium-ah Lalrindika Hmar hoten goal an surtir a, goal ṭhahnem tak phena an thawhrimna leh ruahmanna ṭha hian fak a phu. Chanmari FC tan erawh hun thim a ni a, table mawngphaha a tlak tak avangin hun ṭha inher chhuak leh turin MPL-a inham tan a pawimawh.

Venghnuaiin bul an ṭan ṭha a, minute 20 chhungin goal li an khung tawh; C. Ngurnuntluanga'n goal hnih a khung bakah Peter Lalrinhlua leh Malsawmzuala Tlangte ten goal khat ve ve an khung. Chanmari tan Lalbiaknia Royte-in goal ṭha bik khung mah se second half-ah Sawma Tlangte-in goal khat dang a khung belh a, Vanlalthanga'n penalty aṭangin a khung belh bawk.

Goal ruk maw!
Venghnuai leh Chanmari ten attacking football nen bul an ṭan a, goal chance pawh an nei thei mai. Team pahnih danglamna chu Venghnuaiin an chance neih an hmang ṭangkai a, Chanmari erawhin chance nei mah se Venghnuai keeper Joel B. Lalramchhana khelh ṭhat ṭum an tawng.

Inkhelh ṭantirh lamah Chanmari an tlusawp nghal. Minute thumna lekah C. Nuna'n goal hmahruai a khung a, Chanmari keeper Lalrinzuala tibuaitu Sawma Tlangte tha a thawh hlawk. Minute 13-naah C. Nuna bawkin Sawma Tlangte cross chu cool takin goal kilah a dah.

Venghnuai captain VL Thanga a inlar zui a, minute 16-naah Hualngohmun tlangval ball pek ṭha zet chu Zemabawk North tlangval Peter Lalrinhlua'n goal ruakah a khung. Minute 20-naah Thanga cross chu Sawma Tlangte-in a khung leh bawk.

Venghnuai keeper Ramchhana pawhin save ṭha ṭum hnih a nei a, minute 25-naah Chanmari player Lalbiaknia Royte ball pet erawh dan rual a ni lo - box pawn aṭangin goal kilah tak a kum lut.

Second half-ah Chanmari an insiamṭhat thei lo a, ball-in Joseph Lalnunpuia kut a per avanga an penalty hmuh chu VL Thanga'n minute 54-naah a khung. Chanmari an vanduai chhunzawm a, H. Lalmuankima'n penalty a khung lo - keeper Ramchhana'n penalty a dan zawh chiah hian ṭum hnih ṭha zetin a dang nghal!

Minute 79-naah Sawma Tlangtein Venghnuai goal rukna a khung a, Tea Chinzah cross chu box chhung aṭangin ṭha takin a pet goal. Kumin kumtir lam khan FC Venghnuai hian MPL U18 nomawi an chawi a, hemi ṭuma player pawimawh Ramchhana, Sawma Tlangte leh C. Nuna te hi MPL-ah an ṭangkai chhunzawm hle.

A tam mah mah!
Chanmari hi MPL team lian zinga mi an ni a, MPL Big 4 tih chuan Aizawl FC, Chanmari FC, Mizoram Police leh Chhinga Veng te chu tel ngei tur an ni. Kuminah pawh Chanmari hi sum seng hnem pawl ni mah se a bilh a tho lo laklawh a, Rochhingpuia hnuaia result ṭha an neih loh hnuah K. Malsawmkima hnuaiah an buaina belhchhahin a awm.

Coach Mala hnuaiah Chanmari hian point khat chiah an la hmu a, chu chu an match hmasa bera Police nen 1-1 a an inhnehtawk kha a ni. Khami hnu khan Chanmari hi vawi li ngawt an khel leh tawh a, an chak lo vek. Mala hnuaiah Chanmari hian match nga aṭangin point khat chiah an hmu a, goal 16 ngawt an chhuah - clean sheet an la nei lo.

MPL-ah point hlawh chhuah a har a, chutihrualin Mala hnuaiah Chanmari hian match hnih ngawtah goal ruk an chhuah. Mala hote tlarhnung a pawp a, Chanmari hian MPL khelh zel an duh a nih chuan insiamṭhat ran a ṭul hle.

Semifinal leh relegate
Venghnuaiin point thum an hlawhchhuah avangin semifinal an hnaih leh ta sawt. Coach Rindika Hmar chuan, "Semifinal sawi nan a la hma mah mah. Chanmari laka kan khelh dan erawh a ṭha thlawt. Ramdina leh Zira te an khelh theih dawn lo tih zing lamah kan hre chauh a, formation thlak chawpchilh mah ila ṭha takin kan khel chhuak. Ka naute ka chhuang hle.

FC Bethlehemin point an hmuh chhuah ve tak avangin Chanmari erawh table mawngphahah an awm a, tun hnaia an result thlir phei chuan tla awm ber an ni ta zawk. Chanmari coach K. Malsawmkima chuan, "Relegate lo turin theihtawp kan chhuah dawn. Match thum khelh tur a la awm a, kan kutah engkim a la awm," tiin inkhelh banah a sawi.