Bethlehem leh Chawnpui an inhnehtawk

Zote Honda MPL9 boruak a nung ṭha a, goal a lut duh bawk. Nimin chawhnu inkhelah FC Bethlehem leh Chawnpui FC te inkhelah goal li a lut a, 2-2 in an inhnehtawk. Point khat hlu tak avangin MPL kaithar Bethlehemin table mawngphah an chhuahsan a, Chanmari FC chungah an awm.

Lalsangzuala Hmar kaihhruai Chawnpuiin point 16 an hmu a, a sang paliah awm rih mah se nizana Chhinga Veng leh Electric Veng inkhel result a zirin semifinal khel thei chin aṭangin an la chhuak leh thei ang. MPL semifinal khelh inchuh boruak a sang zel dawn.

RG Stadium-a inkhelah semifinal khelh tum Chawnpuiin goal an khung hmasa zawk. Siaha tlangval MC Malsawmzuala ke a hmui chhunzawm zel a, minute 14-naah penalty aṭangin goal hmahruai a khung. Bethlehemin first half-ah vek an sut a, hmun chep tak kara fing taka goal-a pettu Lalnunzira'n goal ban chauh pet per thei mah se a per chu Lalchungnunga'n chiang takin injury time-ah a khung.

Second half-ah Bethlehemin hma an hruai a, minute 63-naah Sena Ralte vawrhluh chu Chungnunga'n ṭha zetin a goal hnih a khung nan a tauh lut. Coach Victor Lalbiakmawia hote chak thei dinhmunah an ding a, amaherawhchu hun pawimawhah tlarhnung a pawp. Minute 78-naah freekick vawrhluh satliah anga lang chu veteran striker Samuel Laltlanthanga'n tauh fuh zeuhin Bethlehem keeper Lalchawisana'n a tihtur a ti lo. Chutihrualin tualchhung football ngaihven chin chuan substitute Samuel-a'n goal pawimawh a khung ṭhin tih an hre vek ang.

Hun tawp lamah semifinal khelh tum Chawnpui aiin tlak hlau Bethlehem goal bawh a na zawk a, goal erawh a lut tawh lo. Team pahnihin an phu angin point khat ve ve a hlawh chhuak. Bethlehem coach Victor Lalbiakmawia chuan, "Penalty tur ni loin kan hria a, a ho kan ti. Chak tumin kan khel a, kan tum ang ti hlawhtling lo mah ila table mawngphah kan chhuahsan a, result ṭha tho a ni," tiin a sawi.