Djokovic hnehtu Rune a champion

Denmark rawlthar Holger Rune chuan champion lai Novak Djokovic hnehin Paris Msters title a la, a tan chuan Grand Slam dawta inelna sang bera a champion vawi khatna a ni.

Pathianni zana final inkhelah Djokovic hi rinkai zawk a ni, mahse kum 19 mi Rune hian vawi ruk champion tawh Novak hi 3-6, 6-3, 7-5 in a hneh a, Paris khawpuia inelna neihah hian Boris Becker (1986) hnu lama champion leh thei naupang ber a ni hial.

Nizan khan world ranking thar tihchhuah a ni a, ranking tharah hian Rune chu a vawi khat nan a sang zual 10 zingah a inhlangkai bawk ang, a tan chuan season ṭha a ni a, kum tawp lam a duhawm zual bawk.

Set khatnaah Djokovic hian 3-1 in hma a hruai a, a tlang zui thei bawk. Set thumnaah pawh Serbian star hian 3-1 in hma a hruai fal leh hman, mahse break point a hmuh vawi ruk ngawtah Rune hi a inchhanhim thei.

Final bikah hian hnehna chang turin darkar hnih leh minute 34 hun a hmang, final kalkawngah Hubert Hurkacz, Andrey Rublev, Carlos Alcaraz leh Felix Auger-Aliassime te a hneh bawk, a tan chuan tournamnet ṭha bik a ni ngei ang.

Rune chuan, "Ka naupan lai aṭangin Djokovic inkhel hi ka en tawh, ka player duh takte zinga mi a ni, ani nena kan inkhel thei hi ka lawm. Ka beisei phak baka ṭhain ka khel, nakkumah pawh inlan leh ngei ka tum," tiin a sawi.

A khingpui fak letin Djokovic chuan, "A chak lo zawk nih hi chu engtik lai mahin a nuam ngai lo. Mahse, ka khingpui Rune kha a khel ṭhain tawh a khirh hle, a rilru puthmang ang kha ka duh chi," tiin Rune chu la naupang mah se a rilru a paukhauh tih a sawi.