MotoGP champion Bagnaia

Bike intlansiakna sang leh ngaihhlut ber Moto GP chu tun season atan an tlan zo, inelna hnuhnung berah champion a chiang chauh. Francesco Bagnaia chuan a vawi khat nan nomawi a chawi, season chawhnu lama a rawn chet dan a turu hle.

Season hmasa champion Fabio Quartararo-a'n kumin tir lamah hma a hruai, tuna champion ta Bagnaia ai hian point 91 zeta san fal lai pawh a nei. Mahse, season chawhnu lamah Yamaha rider hi a chesual nasa, a hmahruaina pawh a hum zo ta lo a ni.

Pathianni zana tlan zawh tak Valencia Grand Prix-ah Bagnaia hi pakuana a ni a, duhthusama ṭhain tlan lo mah se champion nan a tawk. Ducati rider elpui ber Quartararo chu palinaah a thleng a, hnehna changtu chu Alex Rins a ni thung.

Kum 25 mi Bagnaia chuan, "Ka thil tum ber chu a hmasa zual panga zinga tel a ni, mahse harsatna ka tawh deuh avangin duh ang thlapin ka tlan thei lo. A nihna tak sawi chuan, pawn lam boruak zawng zawng nen, intlansiak ka hmachhawn tawh zinga harsa ber a ni," a ti.

Italian rider zingah Bagnaia hi Valentino Rossi (2009) hnua MotoGP champion ni leh thei hmasa a ni a, a kum a la tam loh avangin season tharah pawh beisei a nei sang dawn, chutihrualin fal taka kal erawh a harsa ang.

Marc Marquez-a'n 2019 thleng kha hneh sawh takin MotoGP hi a thunun, hliam vanga a buai hnuah mimala inelna awp thei an la awm rih lo. Tun hnai season thum chhungin champion pathum - Joan Mir, Quartararo leh Bagnaia te kan hmu.