Atletico an chak zo lo leh tawh!
Champions League aṭangin an tla a ni satliah lo a, Europa League pawh khel phak loin Atletico-in European football an mangṭha a, an mualphona chu nasa tak a ni.
Porto laka 2-1 a an tlawm khan Atletico-in European football an khel dawn lo tih an hria a, coach Diego Simeone chuan, "Hetiang ang buaina aṭanga talchhuah theih dan ka hriat awmchhun chu inlungrual tlat a, club, fan-te nen kan vaia thawhho a ni," a ti a, an buai tih a pha lo.
Antoine Griezmann pawhin, "Group stage-ah match khat chauh kan chak a, engmah kan phu lo. Champions League round of 16 emaw Europa League emaw pawh kan phu lo. Tunah chuan ngawih hmak a, theihtawp chhuaha beih chu tih tur a ni mai," a ti.
Mahse, Atletico Madrid an harh thei chuang lo - Champions League aṭanga an tlak hnua an match hmasa ber chu Pathianni zan khan an khel a, player 10-a khel Espanyol chu 1-1 in an inhnehtawkpui!
A ropui lo
Mahni khelmuala inlan an ni a, an mikhual hi La Liga table mawng lama awm Espanyol an nih bawk avangin Atletico beiseina a sang - minute 28-na lekah Madrid khaw club tan chanchin lawmawm a thleng zui.
Uruguayan defender Leandro Cabrera chuan Alvaro Morata laka a foul avangin red card a hmu a, Spanish striker tla fal tur dan dan ṭha bera a hriatin a buan thlu a, referee-in red card a pe.
Mahse, Atletico-in a tam zawk an nih an chhawr thei chuang lo a, goal khung an harsat. First half chhungin goal a awm lo a, 0-0 in chawlhlawk an hmang - team pahnih quality leh Espanyol an kim lo tih hriat chuan, thil mak a ni.
Minute 62-naah a aia mak zawk a thleng - player 10-a khel leh mikhual team zawk Espanyol tan Sergi Darder chuan goal a rawn khung a, Atletico player leh fan te an hawihai.
Mualpho hliahtu Felix
Mahni mualah Atletico an mualpho ngei dawn niin a lang - Espanyol laka tlawm a mualpho thlak a, player kim loin mikhual hi an khel tih hriat chuan a mualpho thlak lehzual.
Mahse, a team mualpho lutuk tur ngaingam loin bench aṭanga luhtir Joao Felix chuan a team a chhanchhuak a, Atletico-a beisei phak lo forward hian theihna sang tak a la nei reng tih pholangin, minute 78-naah si phurh a sut.
Atletico-in chakna goal khung turin hun tlem an la nei a, mahse, goal dang an khung tawh lo - minute 90 chhungin vawi 27 shot an nei a, goal zawnah vawi sarih chiah a kal!
Madrid khaw club hian league match 13 an khelh tawh aṭangin point 24 chiah an la nei a, he thu buatsaih a nih laia hmahruaitu Barcelona an phak lohna chu point 10 a tling tawh - nizan khan pahnihna Real Madrid an inlan a, he thu buatsaih a nih lai hian result kan hre hman lo.