Bundesliga Chungnung nih inchuh Bayern hmaah Leipzig

Bayern Munich chuan Pathianni zan dar 10:30 hian an elpui RB Leipzig chu Allianz Arena-ah an mikhual dawn, Bundesliga hmahruaitu leh an hnuai chiaha awmte inkhel tur hian ngaihven a hlawh.

German champion Bayern tan league nomawi a nghing mek, pahnihna Leipzig nen an inthlauhna chu point khat chauh a ni - chetsual a thiang lo. Pathumna Borussia Dortmund chuan na takin an um zel bawk.

Bayern sporting director Hasan Salihamidzic chuan, "Tunge roreltu chu tih a lang ang," tiin Leipzig nen an inkhelh tur chungchang a sawi lawk a, coach Hansi Flick chuan hnehna chan an tum thu a sawi bawk.

Leipzig hian krismas vuatvetah kha chuan hma an hruai, mahse Eintracht Frankfurt an hneh loh bakah Borussia Moenchengladbach nen an inhnehtawk avangin chungnung zawk an nihna an hloh, tun ṭumah hian a chung bera awm leh theihna hun ṭha an nei mek.

Team pahnih hi season kal laia khel ṭha tluang an ni a, goal khung thei bik Robert Lewandowski leh striker hmuhnawm Timo Werner te awmna an nih avangin an inkhel hi a 

hmuhnawm ang.

Season hmasa khan Dortmund hian an kut lehlama league nomawi an khawih tawh chu Bayern lakah an chan, kuminah hlawhtlin ngei tumin thapui an thawh leh mek - striker goal khung thei Erling Haaland an neih avangin an phur vanglai a ni.

Dortmund hian zanin dar 11:00-ah Bayer Leverkusen an tlawh dawn, coach Lucien Favre naute hian hnehna an chang a nih a, inkhel lehlamah Bayern an chak lo bawk a nih chuan Dortmund hian an nihrual thei dawn - nomawi inchuh boruak a sang a, an dinhmun inthlak kual thei reng a ni bawk.

Lucien Favre chuan, "Erling Haaland chanchinin sawi a hlawh a, eng vanga inkhel bul ṭantir lo nge ka ni tih zawhna pawh a tam. A taksa dinhmun hi kei aia an hriatchian loh vang a ni, a tana ṭha turin thil kan kalpui," tiin Dortmund tan league match thum aṭanga goal sarih khungtu chanchin a sawi.