Point khat tal chu kan phu - Inter Milan coach

Inter Milan coach Simone Inzaghi chuan Juventus laka an tlawm chu hriatthiam harsa a ti hle a, hun chanve hma lama khel ṭha zawk an nih avangin point khat tal an hlawh chhuak lo chu a ui thu a sawi.

Pathianni zan khan Allianz Stadium-ah Inter hi an lenglut. Old Lady laka a tir lama khel ṭha zawk an ni a, mahse goal an khung thei lo. Mualneitu lamin second half-ah Adrien Rabiot leh Nicolo Fagioli te hmangin an khung thung.

Inzaghi chuan, "Kan elpui lakah kan chak lo a ni a, ṭha taka khel chung sia chak lo nih hi chu a hrehawm bik. Juve khan vannei takin kan goal khung tur an dang hram hram ṭhin, point hmu miah loa haw chu thil hrehawm a ni," a ti.

Inter hian goal khung tumin vawi 14 ngawt an pet a, mahse a hlawhtling lo vek. Lautaro Martinez leh Denzel Dumfries te phei chuan khung ngei ngei theihna turah an hlah tlat si, midfielder Hakan Calhanoglu-a'n bar a tih per bawk.

World Cup hmain Inter hian Bologna leh Atalanta te an la hmachhawn dawn. Juventus-in Verona leh Lazio te an la tum ve leh bawk dawn a ni.

Pathianni zan inkhel dangah AS Roma an chak lo. Jose Mourinho enkawl team hian Lazio chu 1-0 in an ngam lo, inkhela goal awmchhun hi Felipe Anderson-a'n minute 29-naa a khung a ni.