United-in Barcelona an tawng dawn

Champions League aṭanga tla Manchester United tan Europa League-ah pawh kalkawng a awlsam dawn lo - nizan khan Europa League knockout round playoff-a inhmachhawn tur pawh a ni a, United hian Barcelona an tawng dawn.

Europa League-ah hian season hmasa aṭang khan knockout round playoff hi khelh ṭan a ni a, tun hmaa round of 32 an khelh ṭhin kha nuai bo a ni tawh. Group tina hmahruaitu chuan last 16 an lut nghal a, pahnihna leh Champions League aṭanga tla thlaten knockout round playoff hi khelin, last 16 lut tur an zawng ṭhin.

Manchester United-in group stage match tawp berah, thih tha nen Real Sociedad tlanpel ngei tum mah se an hlawhchham a, group-a pahnihna nih pawizia tem tirin an awm nghal - Robert Lewandowski awmna Barcelona hian Champions League-ah beisei phak lo mah se United tan hna a awlsam hauh lo ang.

AS Roma boss Jose Mourinho-a'n, "Champions League-a hlawhchhamte nen kan inkhel dawn," tiin CL group stage-a pathumna nih avanga Europa League-a tla thlate a lo deu lawk a, Italian club hian Red Bull Salzburg an tawng dawn. Europa League last 16 luh inchuha inkhel tur zingah Bayer Leverkusen leh AS Monaco intawng tur pawh en a châkawm a, Juventus tan Nantes paltlang chu hna harsa ni lo tura ngaih a ni.