Aizawl FC-in Police an hneh ta

Honda MPL9-ah Aizawl FC-in team ṭha ber an ni tih lantir nan I Day Football fi nal-a an hneh loh Mizoram Police chu nimin tlai khan 1-0 in an hneh. RG Stadium-a inkhelah hian I League club captain Lalchhawnkima'n goal awmchhun a khung a, Standy Rosario hoten point thum an hlawhchhuah avangin chhiarkawp dan thlapin semifi nal an lut.

Aizawl FC hian November 15, Thawhlehni aṭangin I League an khel ṭan dawn a, tun season I League champion-in season tharah Indian Super League an khelh dawn avangin inelna hian ngaihhlut a hlawh thar. I League lama an insawrbing theih nan Aizawl FC tan MPL semifinal ticket neih hi a pawimawh a, rilru huaisenna belhchhah nan tun season-a vawi hnih an hneh tawh loh Police hneh hi a pawimawh bawk.

AFC hian ṭan phat aṭangin passing game ṭha tak an lantir a, goal khung erawh an harsat. MS Dawngliana goal khung tur chu Police keeper F. Lalmuanawma'n ṭha takin a dang. Muanawma hi MPL9-a keeper khel ṭha bera chhal theih ni mah se second half-ah a chesual. AFC winger R. Lalthanmawia (Amawia) freekick kawh zet chu Muanawma hian a hnek chhuak na tawk lo a, Chhawnkima'n awlsam takin a tauh goal.

Aizawl FC-in season ṭha tak an hman theih nan Chhawnkima a pawimawh a, Inter Village-a Champhai Kanan champion puitu hi I League club tan tlarhnungah hotu pawimawh a nih bakah goal a khung thei hle. MPL9-ah Chhawnkima hian goal nga a khung tawh.

Mizoram Police erawhin AFC lakah point an hmuh loh avangin semifinal lut tur hmabak a khirh sawt. Lalbiaksanga Colney hote hian point 16 an hmu a, nizan inkhela Chhinga Vengin Electric Veng an hneh a nih phei chuan palinaah an tla thla dawn. I Day Football champion Police tana chanchin lawmawm erawh Chawnpui FC-in point khat chauh an hmu a, palina chinah an la inhamtang.