Liverpool-in lei duh em? Hralh an phal e!

English club hlawhtling ber pawl Liverpool chu a duh tan lei theih a ni - a man erawh a tlawm lo ang! Reds neitu Fenway Sports Group (FSG) chuan Thawhṭanni zan khan Liverpool hralh an rem tih thu an puang a, football khawvel titi a tling nghal.

FSG hian tun hma pawhin Reds lei duhtute an lo dawr tawh ṭhin a, mahse, Merseyside club neitu nih chhunzawm an thlang. Tunah erawh thuchhuah meuh siamin, Reds lei duh tan kawng an hawng a, financial services firm Goldman Sachs leh Morgan Stanley chuan Reds hralh chungchang hi an buaipui ang.

Liverpool hian tun season-ah beisei an phak lo - Premier League-a match 13 an khelh tawhah point 19 an nei mek a, table-ah pariatna an ni. Champions League last 16 an lut a, Real Madrid nen an intawng ang.

An hralh dawn?
FSG hian an beisei ang zata dawrtu an awm a nih chuan Reds hralh an duh a, an thuchhuaha a lan danah chuan share hralh ṭhen ang zawng pawha kal an tum tho niin a lang - hei hi chu an indawrna zat sumin a hril ang.

Baseball team Boston Red Sox leh ice hockey team Pittsburgh Penguins pawh neitu FSG chuan, "Premier League-ah club hralh leh neitu inthlak thawm a awm reng a, keini pawhin Liverpool chungchangah zawhna kan dawng fo.

"Liverpool-a share nei duha min bia an awm fo a, tun hma pawhin club tana ṭha tur a nih chuan neitu thar awm hi kan pawi tih loh thu kan sawi fo tawh a ni," an ti a, mahse, FSG hian nikum khan FSG share 11% chu pound maktaduai 533-in RedBird Capital Partners hnenah an lo hralh tawh a, Liverpool hi tlawm taka hralh an tum lo ang.

Hmalak mekna
FSG hian New England Sports Ventures tih hming puin, October 2010 khan George Gillett Jr. leh Tom Hicks hnen aṭangin Reds hi £300mtd-in an lei a, Liverpool an lei hnuah Premier League, FA Cup, League Cup, Champions League, UEFA Super Cup leh FIFA Club World Cup nomawi an chawi tawh.

Khelmual chhungah chauh an hlawhtling lo - FSG hian Anfield an chei ṭha bawk a, main stand thar siam nan £110mtd an seng a, Anfield Road Stand siamṭhat nan £80mtd an seng bawk.

Liverpool khelmual Anfield-ah hian mi 53,394 an leng a, stand an siam ṭhat hnuah hi chuan mi 61,000 an leng ang - Anfield stand thuamṭhatte hi nakkum nipuiah an luah hman ang.

Fans an lo lang
FSG-in Liverpool hralh an tum a, fans an lo lang nghal - Liverpool ṭantu intelkhawm pawl, Spirit of Shankly chuan Reds chu hralh a nih dawn chuan, FSG chuan fan-te an rawn an beisei thu an sawi.

SOS chuan, "FSG-in Liverpool an zawrh thu kan lo hria a, Spirit of Shankly chuan LFC hnenah an hmalaknate chiang taka sawi turin lehkha kan thawn tawh a ni. Chhanna kan hmuh hma chu thil lo sawi lawk kan tum lo a, mahse, club hralh a nih dawn chuan Supporters Board leh SOS te chu inbiaknaah telh ve nih kan beisei," an ti.

Liverpool-ah hian basketball star LeBron James chuan kum 2011 khan 2% share a lo lei tawh bawk a, hetihlaia £4.7mtd-a a lei share hi tunah chuan £37mtd-a hlu a ni tawh!

Hralh duh chhan
FSG-in football club hlun ber pawl Liverpool hralh an duh thu an sawi thut a, football fan-ten mak an ti a, a chhan an inzawt - a chhan langsar ber chu sum a ni!

Liverpool neitute hi American sumdawng an ni, tih theihnghilh loh a ṭha a, hlawkna an thlir ang. Tun hnaiah Chelsea chu £4.25tld-a hralh a ni a, hei hi FSG lam hian an hai lo - heti zat hian Liverpool hralh ve theih an inring a, hlawk an duh.

Saudi Arabia PIF-in Newcastle United an lei hnuah an hausak belh a, Premier League-a 'Big Six' chu 'Big Seven' ni thei dinhmunah a ding mek - Liverpool tan transfer bazar leh khelmuala el tur an tam sawt a, FSG chuan hei hi an hai lo!