Barca lawm nan Real an tlawm!

Rayo Vallecano khelmualah Real Madrid an tlawm a, a lawm ber chu Barcelona an ni - Thawhṭanni zan khan La Liga-ah Vallecano chuan 3-2 in Real an lo hneh a, league table chung berah Barcelona an awm chhunzawm.

Madrid derby-ah hian mualneitu team tan Santi Comesana chuan minute ngana lekah goal hmahruai a khung a, Real an hawihai - mahse, Real tan Luka Modric (penalty) leh Eder Militao ten an chhanglet a, 2-1 a ni.

Team ṭha zawk Real hi awlsam takin an chak zui mai dawn niin a lang hman a, mahse, beisei angin thil a kal lo. Goal an khung aṭanga minute hnih hnu lawkah Alvaro Garcia chuan Rayo tan a khung ve leh a, 2-2 in chawlhlawk an hmang.

Second half-ah Real an comeback dawn emaw tih laiin Rayo bawk an che fuh - minute 67-naah Dani Carvajal-a'n a kutin ball a tawk fuh a, video assistant referee rawn a nih hnuah penalty a chawi.

Rayo tana Oscar Trejo pet chu Real tan goalkeeper Thibaut Courtois chuan dang zet mah se, goal line aṭanga a lo tlan chhuah hman avangin pet nawn a ni a, Trejo-a'n a hlah nawn tawh lo.

Real-in vawi 31 zet shot nei mah se vawi hnih chiah target-ah a kal a, goal an khung theih tawh loh avangin tun season La Liga-a a vawi khat nan an tlawm a, point hnihin Real Madrid an phak lo zui.

Real manager Carlo Ancelotti chuan, "Rayo khelh dan kan hria a, result hi a awm lo hran lo. Keini aiin an ṭha zawk a, an chance neih an chhawr zawk bawk - hnehna chan an phu a ni," a ti a, chak loh chhuanlam a zawng lo.

Nizan khan hmahruaitu Barcelona hi an inlan zui a, he thu buatsaih a nih lai hian result kan hre hman lo - an chak chuan Real nen an inthlauhna hi a sang leh sawt ang.