Denmark squad-ah Eriksen

Manchester United midfielder Christian Eriksen chu FIFA World Cup khel tur Denmark squad-ah a tel. Denmark hian Qatar-a zin tur player 26 zinga player 21 hming an tar chhuak a, Euro 2020-a lungphu chawl vanga khelmuala tlu Eriksen hi a tel.

Kum 30 mi Eriksen hi nikum khan Euro 2020-ah Finland an hmachhawn ṭumin khelmualah a tlu a, a lungphu chawl hman hial mah se a nun an chhan hman. Danish midfielder hi inkhel leh thei lo tur hiala sawi ni mah se tunah erawh Manchester United player pawimawh a ni leh tawh.

Kumin March thla khan Eriksen hi Denmark tan khel leh tawhin Netherlands nena an inhmachhawn ṭumin goal hnih a khung. World Cup-ah pawh Eriksen hian Denmark tan hmun pawimawh a chang ang.

Denmark hi group D-ah champion lai France, Tunisia leh Australia nen an awm ho a, knockout stage lut pha tura ngaih an ni. Denmark manager Kasper Hjulmand chuan, "Hmun ruak panga hnawhkhah tur a la awm a, player 10 aṭanga 12 enthlak lai an awm," tiin player ṭhenkhat tan league khelh hmabaka chet ṭhat a la pawimawh thu a sawi.

Denmark preliminary squad
Goalkeepers: Kasper Schmeichel (Nice), Oliver Christensen (Hertha Berlin).
Defenders: Simon Kjaer (AC Milan), Joachim Andersen (Crystal Palace), Joakim Maehle (Atalanta), Andreas Christensen (Barcelona), Rasmus Kristensen (Leeds United), Jens Stryger Larsen (Trabzonspor), Victor Nelsson (Galatasaray), Daniel Wass (Brondby).
Midfielders: Thomas Delaney (Sevilla), Mathias Jensen (Brentford), Christian Eriksen (Manchester United), Pierre-Emile Hojbjerg (Tottenham).
Forwards: Andreas Skov Olsen (Club Bruges), Jesper Lindstrom (Eintracht Frankfurt), Andreas Cornelius (Copenhagen), Martin Braithwaite (Espanyol), Kasper Dolberg (Sevilla), Mikkel Damsgaard (Brentford), Jonas Wind (VfL Wolfsburg).