Tlai dar 1:30-ah T20 Cricket World Cup semifinal New Zealand Vs Pakistan

T20 Cricket World Cup semifi nal chu vawiin tlai dar 1:30 hian khelh ṭan a ni dawn a, Sydney Cricket Ground-ah New Zealand leh Pakistan ten an khel dawn.

Semifinal hnuhnung zawkah India leh England ten November 10, Ningani tlai dar 1:30-ah an khel leh ang. Semifinal khel tur team pali New Zealand, India, Pakistan leh England te hi team ṭha vek an ni a, team ṭha dang Australia leh South Africa te an tel pha lo. Super 12 aṭanga lang chiang tak chu engmah a chiang lo tih hi a ni a, semifinal khel tur team pali hian hneh loh an tawng vek tawh.

Babar Azam-a hun?
Pakistan captain Babar Azam hi khawvel cricketer ropui zinga tel pha tura theihna neiah an ngai a, fak pawh a hlawh ṭhin hle. Amaherawhchu, Babar Azam hi Asia Cup aṭang tawhin khelh ṭhat ṭum a nei meuh lo.

Super 12-ah pawh Babar Azam hi India lakah run a siam lo a; Zimbabwe (4), Netherlands (4), South Africa (6) leh Bangladesh (25) lakah pawh a run a siam tawh lo. Pakistan captain hian match nga aṭangin 39 runs chauh a la siam a, a record hi a chhuanawm loh hle.

Mahse, Pakistan mentor Matthew Hayden chuan, "Semifinal-ah run a siam ṭeuh a nih chuan mak ti suh u. Player ṭha bik chu hun rei tak an che chhe ngai lo a nia. Century leh half century te hi siam reng theih a ni lo a, chet chhiat chhang a awm. Mahse, hun ṭha a rawn inher chhuak leh ṭhin," tiin a sawi.

Babar Azam bakah hian bul a ṭanpui Mohammad Rizwan te an che ṭha tawk lo a, chutihrualin middle order lam an che ṭha. Mohammad Haris chu player ṭha zinga mi niin bowling lamah Shaheen Afridi, Naseem Shah, Mohammad Wasim leh Haris Rauf te an che ṭha. New Zealand tan Pakistan hi hneh tur chianga dah a rem lo.

World Cup hma pawhin one off tournament khelh a ni a, Pakistan hian final-ah New Zealand hi an hneh.

Record ṭha chu
Pakistan hian New Zealand hi World Cup semifi nal-ah ṭum thum an hmachhawn tawh a, hnehna an chang vek. Kum 1992 khan ODI World Cup semifi nal-ah Pakistan hian wicket liin an hneh a, 1999 ODI World Cup semifi nalah phei chuan wicket kuain an hneh.

T20 World Cup semifinal-ah kum 2007 khan an inhmachhawn a, Shaheens hian wicket rukin hnehna an chang. Record thlirletin Pakistan dinhmun a ṭha a, hriat tel atana ṭha erawh an intumna hnuhnung ber pawh hi kum 15 liam ta kha a ni.

Team ṭha Black Caps
New Zealand hi an ṭha rual a, team angin an che ṭha. Australia an sawp ṭumin Devon Conway-a'n thi loin 92 runs a siam a, Sri Lanka lakah Glenn Phillips-a'n 104 runs a siam a, captain Kane Williamson pawhin Ireland an hneh ṭumin 61 runs a siam.

Black Caps captain Kane Williamson chuan, "Player pahnih khatah kan innghat lo a, team angin kan ṭha," tiin a sawi. Batter Glenn Phillips chuan, "No. 3-a Williamson kan nei hi kan tan chuan rangkachak a ni. Ani hi chuan awlsam takin ball 20-ah 50 runs a siam thei," tiin a chanchin a lo sawi tawh.

Williamson hi batting-ah a ṭha tih chu hai rual a ni lo a, player danglam bik a nihna erawh hruaitu ṭha a nihna hi a ni. New Zealand tan hian kum bithliah inelna aṭangin captain hna hi a chelh tawh a, kum 2016-a Brendon McCullum-a'n inkheh a chawlhsan aṭang khan cricket inelna pathum T20, ODI leh Test-ah captain hna a chelh vek.