RT-a hoin Electric Veng an êng zel

Zote Honda MPL9-ah Electric Veng FC-in coach thar Lalremtluanga hnuaiah harhtharna an chang chhunzawm zel a, Thawhṭanni khan zan khan Chhinga Veng FC 1-0 in an hneh. Coach RT-a hian tlak hlauhawma ding EFC hi match li chhung lekin semifinal beisei ngam team-ah a siam.

RG Stadium-a inkhelah Chhingcows leh Electric Veng ten attacking football an khel ve ve a, goal chance pawh a tam. Amaherahwchu, team pahnih tlarhma an hriam tawk lo a, goal awmchhun hi penalty aṭanga lut niin Jonathan Lalrawngbawla'n minute 26-naah a khung.

October thla laihawla MPL7 round 7 khelh a nih khan Venghnuai pa Lalremtluanga hian RG Stadium-ah inkhel a rawn thlir a, inkhelh banah, "MPL hi chu a harsa a, team tin an intluktawk. Inkhel a hmuhnawm a, player-te pawh an ṭha," tiin Vanglaini a hrilh.

Round 6-ah hian Electric Vengin Chawnpui an hneh lo a, he round hi Khawzawla round 7 khelh zawha khelh a ni. Match sarih khelh zawhah EFC hian point li chiah an hmu a, table mawngphahah an awm.

Electric Veng FC-in round 8 khelh hmain coach atan Lalremtluanga an lakluh thu an puang a, hmabak a harsa dawn tih chu thil chiang a ni. EFC hian club chhungah harsatna an tawk a, player hrem leh hliam vangin match day squad-a ṭhu daih pawh an awm lo.

Player transfer hun a tawp tawh bawk avangin Electric Veng hmabak a thim. Mahse, RT-a hian risk rawn lain Electric Veng hi dinhmun chhia aṭangin dinhmun ṭhaah a rawn dah.

EFC hian RT-a hnuaia an match hmasa berah player 10-a khel chungin Bethlehem chu 3-3 in an chelh a, hemi hnu Lalsangzual Hmar kaihhruai Chawnpui FC chak tluang lai chu titawpin 0-0 in an chelh leh bawk.

Electric Veng hian team ṭha zawka ngaih Chanmari FC chu 2-0 in a hneh a, match hnuhnung berah Chhinga Veng 1-0 in an hneh leh ta bawk. EFC hian match hmasa pasarih aṭangin point li an hlawh chhuak a, RT-a hnuaiah match li aṭangin point riat a rawn hlawh chhuak - heta ṭang hian RT-a hnathawh ropuizia a lang.