A thiam zinga thiam ber Garcia

Hmeichhe tennis thiam zual pariat inelna WTA Finals chu nimin khan khelh zawh a ni a, a ṭha bikte inelnaah Caroline Garcia a champion. Garcia hian Aryna Sabalenka chu 7-6(4), 6-4 in a hneh a, tennis a khelh hun chhunga a nomawi hlu ber a chawi.

Fort Worth, Texas-a inelna neihah Garcia hi rinkai ber a ni hran lo, mahse a champion miau si. Point hnuhnung ber a hmuh hnuah a kutin a hmai a hup a, a mit aṭanga mittui rawn luang chhuak a dang zo lo - a duhthusam ṭhin kha a takin a thleng dik.

Kum 29 mi Garcia chuan, "Ka tan chuan ni chhinchhiah tlak a ni a, ka theihnghilh tawh ngai lo ang. Ni khat atan match khat a tawk a, match khat atan point khat te te hmuh belhkhawm kha a tawk em em bawk.

"Inkhel boruak a san avangin tihsual chu ka nei ngei mai, mahse ka tihsual nasat hmain ka insiamṭha thei. Hun remchang ṭha ka neih ka chhawr ṭangkai theih hlauh avangin ka lawm takzet," tiin a sawi.

France nula hi seeded parukna a ni a, player inlan pariat zingah a hnuhnung pawl a ni. Group match pawimawh takah world number 1 Iga Swiatek a hneh thei a, semifi nal-ah seeded pangana Maria Sakkari lakah set a hloh lo.

Kumin June thla laihawl kha chuan Garcia hi world number 70 pawh a ni phak lo. A hnu lamah erawh nasa takin hma a sawn, nomawi pali ngawt a chawi ta - US Open khelh zawh takah khan semifi nal a lut bawk.

World ranking chhuak tharah chuan Garcia hi number 4 a ni dawn, tennis a khelh chhunga a ranking san ber ṭum a ni ang. Season a tawp chhunzawm dawn a, atan nakkum January thlaa tournament khelh leh hlan a ngahhlehawm khawp ang.