Brazil tana World Cup khel tur an puang

World Cup champion vawi nga ni tawh Brazil chuan Qatar World Cup khel tur player 26 an puang. Arsenal player pahnih Gabriel Martinelli leh Gabriel Jesus te tan hmun a awm laiin Roberto Firmino an ko lo.

September thla khan Brazil hian friendly match an khel a, heng inkhelah hian Jesus koh a ni lo. Arsenal striker hi World Cup-ah a zin ve dawn lo niin a lang hman, mahse coach Tite-a'n a hman thiam sa hi inelna lian hmachhawn turin a ringtawk.

Kum 21 mi Martinelli-a'n Premier League match 13 aṭangin goal nga a khung a, player koh zinga naupang ber a ni. Liverpool forward Firmino erawhin match 12 aṭangin goal ruk khung mah se koh a ni lo thung.

Firmino hian nikuma khelh Copa America fi nal hnuah Brazil tan match a la khel leh lo, season hmang ṭha pangngai viau mah se Tite-a'n Real Madrid player pahnih Rodrygo leh Vinicius Jr te bakah Barcelona forward Raphinha a thlan a ngai si a, koh vek theih an ni lo.

Brazil tan hian kum 39 mi Dani Alves chu koh a la ni a, a ni hi Mexican club Pumas UNAM tana khel lai niin Brazil tana feh chhuak upa ber a ni dawn. Barcelona leh Juventus defender hlui hian tawnhriat a nei ṭha, midang tan a ṭangkai dawn.

Tite-a'n Premier League khel player 12 ngawt a ko, a nihna takah chuan goalkeeper phei chu Brazil hian an nei ṭha ber hial ang. Liverpool duhlai Alisson nge i duh zawk Manchester City keeper Ederson tih vel chu an buaina a ni.

Player ṭha leh hming langsar an tam, chung zinga langsar ber erawh Neymar a ni. Paris St-Germain star hian Brazil tan match 121 aṭangin goal 75 a khung tawh, an ram tana goal khung hnem ber Pele a phak lohna chu goal hnih chauh a ni a, record thar siam theihna remchang a nei dawn.

World Cup apianga la inlan thei awmchhun Brazil tana koh zingah Pedro chu a langsar lo awmchhun a ni hial mai thei. Flamengo striker hi kum 25 mi a ni a, ram tan match hnih chuah a la khel, rinrawl ni dawn lo mah se atan World Cup khel tura koh nih kha chawimawina a ni phak ang.

Brazil Squad:
Goalkeepers: Alisson (Liverpool), Ederson (Manchester City), Weverton (Palmeiras).
Defenders: Dani Alves (UNAM), Danilo (Juventus), Alex Sandro (Juventus), Alex Telles (Sevilla), Bremer (Juventus), Eder Militao (Real Madrid), Marquinhos (PSG), Thiago Silva (Chelsea).
Midfielders: Casemiro (Manchester United), Everton Ribeiro (Flamengo), Bruno Guimaraes (Newcastle), Fabinho (Liverpool), Fred (Manchester United), Lucas Paqueta (West Ham).
Forwards: Antony (Manchester United), Gabriel Jesus (Arsenal), Gabriel Martinelli (Arsenal), Neymar (PSG), Pedro (Flamengo), Raphinha (Barcelona), Rodrygo (Real Madrid), Richarlison (Tottenham Hotspur), Vinicius Jr (Real Madrid).