Ram tiam lam panin

Cricket Association of Mizoram (CAM) term thar 2022-25 hruaitu turte chu felfai taka thlan zawh a lo ni ta. Tawnhriat ngah leh mawng zang, rual u thluak fim leh ṭhangthar thluak chakte an inchawhpawlh nalh tawk khawpin a hriat.

Thu erawh tisaa chantir turin tun aṭang chuan an pen a ngai tawh dawn. Term khatna 'Honeymoon Period' a lo zo tawh nen, tuna ṭang chuan, hun hmasa lama tawnhriat leh sulhnu ṭangten professional zawk leh bulbal nei nghet zawkin min kaihruai ngei turah ngai ang.

Kan cricket level leh standard khelmual chhung leh pawna hma a sawn chak ang bawkin, anni a fawng chelhtu, a 'governance' hnathawk turte hi honorary post mah nise, thikthu a chhe telh telh dawn a, kil hrang hranga chik zawka thlirna pawh ṭum dang zawng aiin a nasa zual tawh ngei ang. Mizoram Cricket hi tun aia sang zawka min vawrhsak turin duhsakna sang ber ka hlan e .

SAP vs VAI
ICC T20 World Cup semifinal khel turte an chiang ta. Hamara Desh-in Sap ram anmahni awp ṭhin tute England an tum ang a, Sap ho ai pawha English zawk an tih New Zealand-in mak tak maia semifinal tluk leh din fawma rawn lut kan ṭhenawm vai te ho Pakistan an tum ve thung dawn a ni.

Ka ti leh pek ṭhin ang, 'Infiamna khawvel hi chu a dang a ni'. Beisei bote tan beiseina petu, awm thei tawh lo ata awm theih tirtu, drama script hriat lawk ni si lo, a thawnthu tur a hmun leh hmuna chan chawp, a tawp dan tur hriat lawk ve miah loh chu he infiamna khawvel hi a ni.

Kar liam ta Inrinni thleng khan Pakistan hi semifinal an lut theih ring an awm kher lo ang. Tunah erawh chuan Pakistan an la dam a, Indo- Pak Final te pawh kan mithhla leh ṭan tak ruai ruai hi maw.

Thlirlawkna
T20 World Cup-ah, a thlengtu an champion ngai lo kalphung chhawm nung zelin, Australia chu kan mangṭha an ngai. Apartheid buai reh hnua lam ang lo let leh South Africa lah hi team beiseiawm ber ni kumhlun si, MUP member ka inpek hma hian ICC Trophy hi vawi khat tal chawi ve tak maw?

Khelmual zau leh ball sawh sanna Australia hmunah hian, front foot-a ball han khelh pap pap tur ang hi bowler-ten an pe mawh khawp mai. Batter-te tan horizontal shot hman tam a ngai a, chutihrual chuan a khelmual a zau avangin, bowler-ten thang an kam thiam em em si.

Indian batsman zinga hook leh pull khel thiam bera ngaih kaptan Rohit Sharma pawh a la che fuh hleithei lo a, KL Rahul erawh a game a inher danglam hret tih a hriat. Pakistan captain Babar Azam a tak tak pawh semifinal-ah kan hmu thei tawh turah ngai ang.

Babar Azam hi India captain hlui Virat Kohli te anga, ngil taka back foot chunga straight bat tennis lop ang deuha an khel ve ngawt thei a nih loh chuan, sub continent technique anga khawsak reng tum chu a finthlak loh mathei a ni.

CAM term thar leh T20 World Cup semifinal khel tur ram palite, ramtiam lam panna lamtluang i lo thlir zel ang.

- K. Vanlalruata