World Cup playoff Italy an tho thei dawn em?
November 10, 2017-a Vanglaini-in phek 10-naa kan head chu, "Sweden vs Italy: Tu zawkin nge World Cup khel dawn?" tih a ni a, Zirtawp zanah ram pahnih hi an intawng ta ngei - Sweden khelmualah Italy an tlawm a, 1-0 in an chak lo.
Tunah chuan zawhna pawh a dang ta a, ram pahnih intawn hmaa rin hlawh zawk Italy chu dinhmun duhawm lo zawka ding an ni - Italy an tho thei dawn em? tia zawhna inpek a ṭul tawh a, an dinhmun hrechiang bertu Italy coach Giampiero Ventura chhanna chu, "Ṭha chungchuang taka kan khelh a ṭul tawh ang," tih hi a ni. Zanin dar 1:15 hian San Siro-ah second leg an khel ang.
Italy an zawr
Sweden-a inkhelah inkhel ṭan tir aṭangin mualneitu an chungnung zawk a, chawlhlawk hman hnuah Azzurri-in hmasawn mah se Italy kan hmuh ṭhin ang erawh an la ni chuang lo. Minute 61-naah Sweden hian goal hmahruai an khung ta nge nge a, AEK Athens defensive midfielder Jakob Johansson chuan goal hmahruai hi a khung.
Italy tan Matteo Darmian chuan hun ṭha nei mah se Manchester United full back hian a ṭhiante hlimna a thlen thei bik lo a, a hun neih hi post pet per nan a hmang. Zirtawpni zan inkhel pumpui thlirin Sweden an chungnung zawk hrim hrim - Ola Toivonen chuan yard 20 vel lek aṭangin a pet out a, Gianluigi Buffon tan hna hautak a siamsak bawk. Buffon hian Marcus Berg goal khung tur nia lang chu ṭha zetin a dang bawk.
Ventura Italy
World Cup-a vawi li ngawt champion tawh Italy-in qualifying group-ah Spain an awmpui avangin vanduai anga sawi theih ni mah se Madrid khawpuia 3-0 ngawta Spain an ngam lo leh Macedonia 1-1 a an inhnehtawkpui kha chu football thiam ram tia sawi khelh dan a tan chuan beisei a bo hle.
Ventura-a'n 3-5-2 formation a hman avangin Napoli tana khel ṭha tak Lorenzo Insigne tan hmun a awm lo a, tlarhmaah Ventura-a'n Andrea Belotti leh Ciro Immobile hman a thlang zawk - duh erawh a thlang sual. First half-a Italy chance neih chhun chu Belotti koah a tla a, mah se Torino lama Ventura nena lo inhrual tawh striker hian a hun ṭha neih a chhawr lo.
Mangṭha Buffon?
Italy legend Buffon-a'n World Cup zawhah international football a chawlhsan tur thu a puang a, zaninah hnehna an chang zo lo leh a nih chuan Juventus keeper hian a duh aia hmain ram tana inkhelh a chawlhsan a ṭul dawn tihna a ni. Kum 20 kal ta khan Italy hian World Cup khel turin playoff an lo khel tawh a, Russia an hneh - Buffon chuan, "A pawimawh ber chu kum 1997-a kan result ang kha kan neih a ni," tiin zaninah chak a tum.
Kum 19 mi lek nichunga ram tana a match hmasa ber kheltu hi nakkum World Cup-ah a inlan a nih chuan a vawi ruk nan World Cup a khel dawn tihna a ni a, hetiang zat inlan thei hi player dangah an la awm ngai lo - an inpet tling zo lo a nih erawh chuan kum 1958 hnua Italy-in World Cup an khelh loh hmasak ber a ni ang.
Chak tum Ventura
Italy tana chanchin lawmawm loh chu midfielder pawimawh Marco Verratti chu ṭul loa a foul avangin yellow card pek a ni a, second leg-ah Sweden a hmachhawn thei lo ang. Italy boss Ventura a lawm lo, "Result duhawm lo tak a ni a, chutihrualin Milan-a kan inkhelh huna official-te chuan lai takin engkim an ti turah ka ngai. Hetiang ang match pawimawha vuina tur a awm hi pawi ka ti a, tuna pawimawh ber chu result ṭha tak hlawhchhuah a ni," a ti.
Ventura chuan sawi chhunzawmin, "Milan-ah chuan engkim a nih tur ang thlapa kan tih a ngai. San Siro-a fans pungkhawmte pawhin min ṭawiawm a ṭul dawn a, a pawimawh ber erawh keini chuan fan-te tana theihtawp chhuah a ni," a ti a, hnehna chan ngei a tum.