MBL3 kan nghak chhuak ta

Mizoram chhunga badminton inelna lian ber 3rd Hrangbana Me­mo­rial Mizoram Bad­minton League chu vawi­in aṭangin Electric Veng Hall-ah khelh ṭan a ni dawn. Tlai dar 5:00-ah MBL champion hmasa ber Hlimen Shut­tlers leh champion lai Tuikual Shuttlers an inhmachhawn nghal ang a, zan dar 8:00-ah Zotlang Rockets leh Brig & Mrs T. Sailo Kanan te an inkhel ang a, Aizawl West Derby hi a hmuhnawm ang.

MBL3 'Flick Off' chu November 11, Inrinni zan khan Synod Conference Centre-ah neih a ni a, tunah chuan inelna tak tak chiah hmabak a awm ta. Kuminah hian team pariat an tel a, zanina inlan tur hi group A niin vawi khat inkhelh kual hnuah a sang pahnihin semifinal an lut ang. Group B-ah Southern Acers, Cham­phai Ralte Villa BC, Chanmari Evening Stars leh Mission Veng te an awm a, naktuk zan hian heng team pali hian an match hmasa ber an khel ang.

Zanin inkhel dan tur indawt chu Under 19 Boy's Singles, Men's Doubles, Mixed Doubles, Men's Singles - 1 leh Men's Singles -2 a ni a, match hnuhnungah state pawn player ṭha an inlan dawn tihna a ni.

Tuikual Vs Hlimen

Hlimen-in season hmasa bera champion pui­tu Lalmuanawma an chang leh thei a, Tui­kual lamin Samuel Lal­nunmawia an chang thung. Mizoram Police player tawnhriat nei ṭha pahnih hi doubles leh singles an khelh theih avangin court chhungah team tan ṭhat pui tham ve ve an ni a, Muanawma hi chu court pawn lama a awm pawhin a remhriatna vangin danglamna thlen thei a la ni cheu ang.

Tuikual hian BAI number 7 Subham Praja­pati an chah lut a, Hlimen chah luh Raghu M (BAI - 39) aiin ranking-ah a sang zawk a, Under 19 Boy's Singles-ah pawh Hlimen aiawh tur Joseph VL Ringngheta (MBA-7) aiin Tuikual aiawh tur Lalmuanawma Sailo-in (MBA - 4) tawnhriat a nei ṭha zawk a, chak tur erawh hriat lawk theih a ni lo. Match tin a pawimawh dan a inang vek a, player rem fuh a pawimawh ang.

Aizawl West Derby

Zotlang Rockets-in tum fel tak an nei a, Under 19-ah hnehna chan zel beiseiin India number 26 Kiran B an lalut a, Mizo shuttler naupang zawkte tan chona a ni. Brig & Mrs T Sailo Kanan lamin mixed doubles thunun duhin Mizoram number 1 F. Vanlalhriatpuii an kawl ve bawk a, an tum a hlawhtling ang em tih hriat châkawm hle.

Kanan hian India number 70 Shreyansh Jaiswal an chah chhuak a, hei hi danglamna thlen thei tur a ni. Chutihrualin Zotlang lamin men's ranking la nei lo Kiran B an chhawr ṭangkai thei bawk.

Group A
Vawiin inkhel tur
5:00 PM Tuikual Shuttlers Vs Hlimen Shuttlers
8:00 PM Kanan Vs Zotlang Rockets
November 15, Nilaini
8:00 PM Kanan Vs Tuikual Shuttlers
November 16, Ningani
5:00 PM Hlimen Shuttlers Vs Zotlang Rockets
November 17, Zirtawpni
8:00 PM Kanan Vs Hlimen Shuttlers
November 18, Inrinni
8:00 PM Tuikual Shuttlers Vs Zotlang Rockets
Group B
November 14, Thawhlehni
5:00 PM Southern Acers Vs Champhai Ralte Villa BC
8:00 PM Chanmari Evening Stars Vs Mission Veng
November 16, Ningani
8:00 PM Chanmari Evening Stars Vs Southern Acers
November 17, Zirtawpni
5:00 PM Champhai Ralte Villa BC Vs Mission Veng
November 20, ThawhṬanni
5:00 PM Chanmari Evening Stars Vs Champhai Ralte Villa BC
8:00 PM Southern Acers Vs Mission Veng