England leh Germany inhnehtawk

World champion Germany leh England ten Zirtawpni zan khan Wembley Stadium-ah friendly match an khel a, goal awm loin an inhnehtawk. England manager Gareth Southgate chuan player panga ngawt a vawi khat nan a inlantir a ni.

Everton goalkeeper Jordan Pickford-a'n England tana a match hmasa berah Germany hmatawng Timo Werner goal khung tur chu ṭha zetin a dan sak a, minute 90 chhung an goal a venghim thei. Southgate-a'n Joe Hart chu a first choice goalkeeper a nih thu la sawi mah se West Ham si ban nghak Hart hian ram tana hmun nghet chang tur chuan club lamah a chet ṭhat a ngai ang.

Chelsea aṭanga loan hmanga Crystal Palace zawmtu Ruben Loftus-Cheek chu midfield-ah a hmuhnawm a, inkhelh banah Southgate chuan kum 21 mi Loftus-Cheek hi engpawh ti thei tur khawp ṭha a la nih theih a beisei thu a sawi hial.

Manchester United defender Phil Jones chu minute 25-na lekah hliam vanga thlak a ni a, bench aṭangin Liverpool defender Joe Gomez leh Burnley midfielder Jack Cork ten ram tana an match hmasa ber an khel bawk.