World Cup khel tur Tunisia leh Morocco

Africa khawmualpui aṭanga World Cup khel turin Tunisia leh Morocco te chu an inpet tling ve leh ta. Nigeria leh Egypt ten Russia panna tur ticket an nei tawh bawk a, World Cup khel tur African ram pali an chiang tawh; football thiam ram ni ṭhin Ivory Coast tan hmun a awm ve lo.

Inrinni zan qualifier inkhelah Tunisia chuan an mikhual Libya chu goal awm loin an inhnehtawkpui a, Group A-ah hmahruaitu ni chungin an tlang. Tunisia hian match rukah point 14 an hmu a, hneh loh an nei lo; an hnuai chiaha awm Congo aiin point khatin an sang zawk a ni.

Kum 1978 khan Tunisia hian World Cup an khel tawh a, ram leh ram inlena lianah hian African ram zingah hnehna chang thei hmasa ber an ni. Nakkum hi kum 2006 hnua an World Cup leh hmasa ber tur a ni ang.

Tunisia coach Nabil Maaloul chuan, "Hnehna kan chang a, Russia kan pan thei dawn. Kan tum ram kan thlen theih nana player-te khelh dan avangin ka lawm a, hun duhawm kan tawn ngei theih nana theihtawpa min ṭawiawmtu ram mipui chungah pawh ka lawm takzet, nakkumah hian a ti kimtu nih satliah kan duh bik lo ang," tiin World Cup khelh hunah point box nih an tum loh tur thu a sawi.

Morocco an tlang

Group C aṭangin Morocco leh Ivory Coast ten beiseina an la nei a, mualneitu Ivory Coast tan kawng a awlsam zawk dawn niin a lang hman. Mahse, rinlawk angin thil a kal lo; mikhual Morocco tan Fenerbahce winger Dirar chuan minute 25-naah goal hmahruai khungin captain Medhi Benatia chuan an goal hnihna a khung bawk.

Ivory Coast hian na takin nawr let mah se an mamawh goal an nei thei lo, Tottenham defender Serge Aurier chuan na zetin bar a pet per a, a vannei tawk lo, mikhual team 2-0 in an chak. Ivory Coast an tlin loh takah chuan Premier League player Wilfried Zaha, Serge Aurier leh Eric Bailly te chu nakkum nipui laiin an chawl hahdam thei dawn tihna a ni.

Kum 1998 hnua World Cup khel leh tur Morocco hian tun qualifier hi an khel ṭha hle, match ruk khelhah point 12 an hmu a, goal 11 khungin an lamah goal a lut miah lo, pahnihna Ivory Coast ai hian point liin an sang zawk.

Morocco coach Herve Renard hian kum 2015 khan Ivory Coast hi enkawlin Africa Cup of Nations champion a nihpui tawh a, tunah chuan a ram enkawl hlui lakah hnehna changin World Cup ticket a nei leh ta thung a ni.

Kum 49 mi Renard chuan, "Tunah chuan khawvelin Morocco hi football thiam ram a ni tih an hre tawh ang, World Cup-ah Moroccan flag zar a ni leh tur hian mi ti lawm a, ram mipui hlimna thlen theitu ka ni hi ka alwm hle a ni," tiin a sawi.

Inkhel Results

Zambia 2 - 2 Cameroon

Gabon 0 - 0 Mali

Congo DR 3 - 1 Guinea

Tunisia 0 - 0 Libya

Ivory Coast 0 - 2 Morocco