Mirza khup a hliam

India nula tennis star Sania Mirza tan seson duhawm lo a nih chhunzawm zel. Doubles world number 1 hlui Mirza hi a khup na vangin a inkhel thei lo mek a, thla khat chuang a chawlh a la ngai dawn.

Kum 30 mi Mirza chuan, "Ka tan chuan kum duhawm lo tak a ni, ka kawppuite an inhliam fo a, chumi karlakah keiin hliam ka nei deuh reng bawk, result ṭha neih a harsa hle a ni," a ti. Mirza-i'n tournament a khelh hnuhnung ber chu China Open kha niin semifinal-ah a tla.

Martina Hingis nen an thawh-dunna an tih tawp hnuah Mirza hian beisei a phak tawh lo, tun season chu world number 9 ni chungin a khar dawn tih a chiang tawh a, a sang 10 zinga a la tel phak chu lawmawm a tih thu a sawi.

Mirza chuan, "Nomawi ka chawi mumal loh avangin a lungchhiatthlak a, chutih rualin lawmna hmuh tur chu a awm ve tho. Tawnhriat ka ngah phah a, kum dang zawng aiin ka rilru a huaisen zawk pawhin ka hria," a ti.

Singles huanga world number 27 ni tawh Mirza hi player beiseiawm tak ni mah se a ban rek na vangin singles-ah a hlawhtling chhunzawm lo, a hliam vangin vawi ruk ngawt zai a tawk tawh; doubles-ah chuan Grand Slam nomawi pathum a chawi tawh thung.