Rawlthar rual zingah Chung a champion

Association of Tennis Professionals (ATP) hnuaia kum naupang deuhte inel nana buatsaih Next Gen ATP Finals chu Inrinni khan a hmawr bawk a ni a, South Korea rawlthar Hyeon Chung chuan Russian Andrey Rublev hnehin champion hmasa ber a ni.

Milan-a final khelhah kum 21 mi Chung leh world number 37 Rublev te an inhnehtawk hle a, darkar hnih tling lo deuh an inkhelh hnuah Chung hian 3-4 (5/7), 4-3 (7/2), 4-2, 4-2 in hnehna a chang.

World number 54 Chung hi South Korean player zingah Lee Hyung-Taik (2003) hnuah ATP World Tour singles title la leh thei hmasa ber a ni. Chung chuan, "Set khatna ka hloh a, set hnihnaah ka hnufual nghal bawk. Ka hlauthawng a, ka thinrim bawk. Mahse, nomawi chawi tumin thapui ka thawh zui a, a vannei zawkah ka ṭang ta a ni," tiin a sawi.