MBBA Cup 2017 Semfinal team 4 a hriat

Mizoram Basketball Association hnuaia inelna pawimawh pakhat MBBA Cup 2017 semifinal khel tur a hriat kim ta. Khatla TBL, Zarkawt BCA, Mission Veng Vikings leh Tuikual South ten group stage an paltlang. Thawhlehni zanah group match hnuhnung ber khelh zawh tur a ni a, inkhel result-in team dinhmun a sawi danglam thei tawh lo.

Zirtawpni zan khan Hawla Indoor Stadium, Repubic Vengthlangah league round khelh chhunzawn a ni a, Zarkawt derby hmuhnawm takah Mizoram Super League season hmasa ber finalist Zarkawt BCA chuan Serpents lakah 85-78 in hnehna an chang.

BCA tan hian MSL hnuhung bera Vikings champion puitu Lalrina Renthlei chuan point 17 neiin, MSL 3 star ni phak guard Zonuna chuan point 16 nei ve bawkin hnehna an chan theih nana player pawimawh leh langsar an ni. Serpents tan state pawn player Sahil Sharma chuan point 22 thawk chhuak thei mah se semifinal hruai thleng turin a tawk zo lo.

Inkhel hnuhnung zawkah MSL vawi hnih champion tawh Khatla TBL leh Ramhlun Sporting Club inhmachhawn turah RSC an walk over a, TBL lam hi 20 - 0 a chak zawka puan an ni.

Zirtawpni zan Results
Zarkawt BCA 85 - 78 Zarkawt Serpents
Khatla TBL 20 - 0 Ramhlun SC
League Round - Thawhlehni Fixtures
01:30 PM Republic VR4 vs Zarkawt Serpents
05:30 PM Tuikual South BC vs Zarkawt BCA
07:00 PM Khatla TBL vs Mission Veng Vikings