Champhaiah Young Legend's League bul ṭan

Kum 12 hnuai lamin awmze neia football an zirna, Young Legend's League (YLL) chu November 11 khan Champhaia Chhangphut Field-ah bul ṭan a ni ta.

8One Foundation, New Delhi leh Mizoram Football Association ṭang kawpin an buatsaih YLL hi 'baby league' anga kalpui a ni a, Under 12, Under 10 leh Under 8-ah team ṭhen an ni a, thla sarih vel chhung Inrinni leh sikul chawlh­ah an inkhel ṭhin dawn a ni.

Inelna hi 5 vs 5 (Five a side) a kalpui a ni a, age group khatah team 12 zel awmin team khatah player pasarih zel an awm. Inelna hi league a kalpui a ni a, vawi thum ṭheuh an inkhel kual ang. Team pakhatin match 33 zel an nei ang a, league pumpuiah match 594 a awm dawn a ni.

8 One Foundation aiawha a hmuna viltu Prakhar Soni chuan, "Kan bul ṭan dan a lung­awithlak a, naupangin nuam an ti a, a pawimawh ber chu ṭha tak leh hlim taka football an khel thei hi a ni. Duhthusam lo deuh thilte pawh kan insiam ṭha zel ang a, tluang takin YLL hi kan kalpui thei ngei ang. Hei hian Indian football-ah rah ṭha tak a chhuah ngei ang," tiin a sawi.

8 One Foundation dintu Varun Achreja chuan, "YLL hi a hlawhtlin ngei theihna turin theihtawp kan chhuah dawn a, kan kal danah kan lawm khawp mai. Khawtlang nena ṭang rualin kan kal dawn a, kan kawppui MFA leh Champhai District Football Association chungah kan lawm hle a ni," a ti.

MFA honorary secretary Lalnghinglova Hmar chuan, "Kan nghehhlelh em em YLL chu kan ṭan ta. 8 One Foundation hian a senso zawng zawng an tum a, naupang inkhelh thawmhnaw leh ball zawng zawng an tumsak bakah inkhel buaipuitute senso thlengin an tum vek a ni. Champhai DFA an fakawm a, hneh takin bul an ṭan a, ṭha takin an chhunzawm zel ang," a ti.

YLL-ah hian a tam thei ang football khelhtir an ni ang a, inkhelh apiangin man of the match thlan ziah an ni a, lawmman an dawng zel a. Season tawpah league-a a tiṭhate hian lawmman an dawng dawn a, naupang ṭha zualte football academy-a an kal zel dan tur ngaihtuahsak an ni bawk ang.