Dinthar beiseina siamtu Aizawl FC

Aizawl FC-in Zirtawp zan Mizo­ram Premier League inkhelah Chanmari West 2-0 in an hneh a, he result avang hian MPL champion hmasa ber Dinthar FC tan Mizoram football inelna sang bera inhamtan dan kawng a la inhawng zel.

MPL6-ah semifinal khel tur a chiang tawh - Chhinga Veng, Aizawl FC, Chanmari FC leh Mizoram Police ten knockout stage an khel dawn a. Team dang pahnih Ramhlun North leh Bethlehem Vengthlang te an relegate thei tawh lo bawk.

Chanmari West-in Aizawl FC laka point an hlawhchhuah theih loh avangin MPL khel zel turin relegation playoff an hmachhawn a ṭul dawn a, round tawp bera an chetsual phei chuan relegate thei an ni.

A nung tawk lo

Zirtawp zan inkhelah West War­rior-in point hlawhchhuah ngei an tum a, inkhel hmuh­nawm tiha sawi tur ni lo mah se boruak erawh a sang. Aizawl FC-in minute 34-naah Afghan defender Masih Saighani-a'n a tauh lut a, minute 88-naah William Lalnunfela'n goal hnihna a khung leh bawk.

I League club goal hnih hi Andrei Ionescu siam sak ve ve a ni a, Romanian midfielder hi man of the match a thlan a ni.

AFC record a ṭha

Aizawl FC-in round 8-a Mizo­ram Police nen an inhnehtawk hnuah match nga khel leh tawhin an chak vek. I League club hian goal 16 an khung a, goal hnih chhuahin an goal chhuah pahnih pawh hi penalty aṭangin a ni.

AFC coach Paulo Meneses chuan, "Mizoram football hmasawn nan theihtawp kan chhuah a, referee-te pawh an ṭan a ṭul. Min ṭan rawh se ka ti lo, amaherawhchu lai taka an ham hi a ṭul a ni. Kan player-te hi an pet nasa a, min en uluk sak se ka ti hle a ni," tiin Vanglaini a hrilh.

Dinthar beiseina

MPL-ah table mawngphaha awm an relegate dawn a, pariatnaa awm Dinthar FC-in an chung chiaha awm Chanmari West point thum chiahin an pha lo. Maimawms hian head to head-ah West Warrior aiin an ṭha zawk a, hei vang hian round tawp ber a ngaihnawm ang.

Dinthar hian November 16 zanah beiseina nei chungin Chan­mari FC an hmachhawn ang a, point thum an hmuh loh chuan Chanmari West an him nghal ang. West Warrior hian November 17 tlaiah Chanmari West an hmachhawn thung dawn.