Qatar-ah Jeremy a ropui

Tokyo Olympic qualifier zinga pakhat Qatar 6th International Cup 2019-ah Jeremy Lalrinnunga chuan 67kg huangah silver medal a chawi chhuak a, infiamna khawmpui lian kumin nipui laia neih tur Olympic khel thei turin kawng dik a zawh zel.

Inelna hi nikum December 20 khan neih a ni a, Youth Olympic gold medalist Jeremy hian snatch 140kg, clean & jerk 166kg, a total atan 308kg a chawi. A tluk loh chu Zanni Mirko niin, Italian tlangval hian snatch 147kg, clean & jerk 173kg; total 320kg a chawi thung a ni.

Olympic-ah hian world ranking-a a sang pakhatna aṭanga pariatna an tel thei dawn, heng bakah hian khawmualpui hrang hrang- Africa, Europe, Asia, America leh Oceania bakah a thlengtu leh Tripartite Commission Invitation

aṭangin pakhat ṭheuh an tel thei dawn.

India hian weightlifting huangah Tokyo Olympic atan hmun ruak pahnih a nei dawn a, tun dinhmunah chuan Mizo rawlthar Jeremy-a hi a inlan theih beiseina a sang hle. Qatar-ah pawh hian India-in infiammi pahnih chiah a tir, Mizo rawlthar tan kawng a inhawng mek.

Govt. Complex rawlthar Jeremy chher chhuaktu, SYS coach Malsawma Khiangte chuan, "Jeremy hian hma a sawn zel, chutihrualin Tokyo thleng tur chuan hmabak a la ngah hle bawk. Hriselna ṭha a neih theih nan ṭawngṭaipui a mamawh," tiin Vanglaini a hrilh.