MotoGP champion Marc Marquez

Marc Marquez chu khaw­vela bike intlansiakna sang leh ngaihhlut ber MotoGP champion a ni.

Repsol Honda Team rider hian tun hnai kum nga chhungin MotoGP title vawi li a la thei a, kum 24 mi chauh la niin world champion vawi li ni thei naupang ber a ni.

Pathianni zan khan Valencia GP tlan a ni a, Marquez tan hian champion turin 11-na nih phak a tawk a, a hnung chiaha awm Andrea Dovizioso tan nomawi chawi tur chuan pakhatna nih bakah Marquez hi 12-na chinah tal a thlen a ngai; intlansiak hnuhnung ber an tlan hma hian champion tur chu a chiang thawkhat tawh.

Circuit Ricardo Tormo tlan kawnga intlansiakah khawtual tlangval Marquez-a'n pole position aṭanga bul ṭanin a din­hmun a duhawm nghal hle. Lap ruk tlan hmabak an la neih laiin Ducati rider Dovizioso chu che­sual­in a tlan zui thei tawh lo a, Marquez hi pathumnaah thleng mah se point 37 zeta a san fal tawh avangin overall-ah a champion.

Spanish rider Marquez chuan, "Intlansiak chhung zawng kha chuan ka hlauthawng ve deuh a ni. Kawng kawi ṭhenkhatah kha chuan ka chesual ve teuh thei hle, a tawp thlenga ka tlan tluan thei kha ka vannei a ni," tiin a sawi.

Mi bik Marquez
Feet 5 leh inches 6-a sang Marquez hian kum 2013 aṭangin MotoGP bike a khalh ṭan a, rider ropui Mike Hail­wood, Phil Read leh Valentino Rossi te angin khawvel huap inelna chi hrang pathum (MotoGP, Moto2 leh 125cc) a champion kawp thei rider palina a ni.

Kum 1965 khan Mike Hailwood chuan kum 25 leh ni 107-a upa ni chungin MotoGP champion vawi li a ni thei a, tun season champion Marquez hi kum 24 leh ni 268 chauh la niin Britain rider ropui record chu a rawn khum. Tun hnai kum 69 chhungin Marquez chiah hi season riat chhung a zawna intlansiak vawi ngaa hnehna chang tling ziah thei awmchhun a ni a, tun season-ah Spanish rider hian vawi ruk hnehna a chang.

MotoGP a luhchilh aṭanga Hondo bike la khalh char chartu Marquez chuan, "Ka chhungte leh team chungah ka lawm hle, a bik takin season chawhma lam kha ka tan a harsa hle, hun harsa ka tawh laia ka kianga an awm tlat avangin tun hun hi ka thleng thei a ni," tiin a sawi.

Marquez chuan sawi zawmin, "Mihring kan ni a, kan kiangah mi ṭha an awm miau chuan hma lam pana kal hi a awlsam phah ṭhin a ni. Season bul ṭan fuh lo deuh mah ila, a tawp ka khar dan erawh duhthusam a ṭha a ni," a ti.

Kuminah intlansiak vawi 18 a awm a, a hmasa pahnihah Yama­ha rider Maverick Vinales chu pakhatna a ni. A vawi thumna American Grand Prix-ah Marquez hian hnehna chang ṭanin vawi nga dang hnehna chang zuiin tuma elphak loha rider hmuhnawm leh che ṭha ber a ni.