Zaninah India inkhel dawn
AFC Asian Cup UAE 2019 khel tura tling chiang tawh India chuan zanin dar 8:00 hian Myanmar chu qualifier match-ah an hmachhawn dawn a, ram pahnih inkhel hi Star Sports 1 chuan live-in a pe chhuak dawn a ni.
India hian qualifier match hmasa berah Myanmar hi an lo hmachhawn tawh a, captain Sunil Chhetri goal khat khung hmangin hnehna an chang - Goa-a inkhelah pawh India hi hnehna chang tura beisei an ni. Chutihrualin Asian Cup tling chiang tawh an nih avangin coach Stephen Constantine-a'n tawnhriat nei tlem zawk player hman a thlang a nih pawhin a mak lo ang.
Blue Tigers (India sawina) captain Chhetri chuan, "Yangon-a kan inhmachhawn khan keini aiin an ṭha zawk a, kan chak kha kan vannei a ni. Team ṭha tak an ni a, chutihrualin zam tur kan ni lo. Kan result kaltluang tak hi chhawm nun zel kan tum dawn a ni," a ti - India hian international match 13 chhung chu a zawnin tlawm hmel an hmu tawh lo.
India squad-ah hian Mizo pathum an awm a, Chennaiyin FC striker Jeje Lalpekhlua bakah Chennai club tana Jeje-a khelhpui Jerry Lalrinzuala leh Kerala Blasters defender Lalruatthara te chu koh zingah an tel.
Team Dinhmun
Pos Team Pld W D L GF GA GD Pts
1 India 4 4 0 0 8 1 7 12
2 Kyrgyzstan 3 1 1 1 3 3 0 4
3 Myanmar 3 1 1 1 6 3 3 4
4 Macau 4 0 0 4 1 11 -10 0