Brazil-ah Vettel a tlan chak ber

Pathianni zana tlan zawh tak Brazilian Grand Prix-ah Sebastian Vettel chu pakhatna a ni a, world champion Lewis Hamilton chuan a hnung ber aṭangin ṭan mah se palina a ni phak.

A vawi li nana world champion nomawi dawng tawh Hamilton hi qualifying lamah a chetsual avangin pitlane aṭangin bul a ṭan. Britain driver hian beisei phak baka ṭhain inelna a hmachhawn; lap 71 tlan tur zinga lap 31-na an tlan laiin a elpui dangte pit stop-a an luh lai phei chuan hmahruaitu a ni phak hial.

Mercedes driver hian lap 10-na an tlan laiin pakuana dinhmun a luah hman a, a tawpa palina nih hi Hamilton tan result ṭha a ni phak. Mercedes driver pakhat zawk Valtteri Bottas chu pahnihnaah a thleng thung - Ferrari tan Mercedes hma a thlen kha chanchin lawmawm a tling ve thung ang.

Ferrari driver Vettel-a'n lap 71 zinga lap 13 chhung chu hma a hruai thei a, Formula 1 inelna huangah hian vawi 47 hnehna a channa chiah niin tun season bik atan erawh July thla hnua hnehna a chan lehna hmasa ber a ni thung.

Ferrari hian Asia-ah beisei an phak lo a, Singapore, Japan leh Malaysia-ah te Mercedes hnungah zel an awm. Mercedes driver Hamilton leh Vettel te hi July thla kha chuan vawi li ve ve hnehna chang tawhin an inel tawk hle a, Hungarian Grand Prix hnuah erawh Ferrari an talbuai a, an elpui Mercedes an vul thung.

German driver Vettel chuan, "Kar hnih liam ta chhungin hmasawnna kan nei a, intlansiakna hmunah kan duhthusam a thleng dik ve leh thei ta hi a lawmawm hle a ni," a ti. Vettel hian Ferrari chuan rinkai an nih phak tawh loh thu leh champion a chian hnuah pawh puitling taka inelna an la hmachhawn zel thu a sawi bawk.

Mercedes driver Hamilton chuan, "Qualifier lama ka tihsual siamṭhat kha ka tum ber a ni a, a hnung aṭang tlan ṭan chunga palina nih leh theih kha a lawmawm hle. Podium lawn phak ta chiah lo mah ila ka teammate Bottas a lawn thung a, kan team ṭhat zia kan lantir theih avangin lawmna tur hlir a ni," tiin a sawi.

Brazilian GP Results

# Driver Car

1 Sebastian Vettel Ferrari

2 Valtteri Bottas Mercedes

3 Kimi Raikkonen Ferrari

4 Lewis Hamilton Mercedes

5 Max Verstappen Red Bull

6 Daniel Ricciardo Red Bull

7 Felipe Massa Williams

8 Fernando Alonso McLaren

9 Sergio Perez Force India

10 Nico Hulkenberg Renault

Championship Table

# Driver Points

1 Lewis Hamilton 345

2 Sebastian Vettel 302

3 Valtteri Bottas 280

4 Daniel Ricciardo 200

5 Kimi Raikkonen 193

6 Max Verstappen 158

7 Sergio Perez 94

8 Esteban Ocon 83

9 Carlos Sainz 54

10 Felipe Massa 42