T20 Cricket World Cup ; England hmaah India fiahna
India mipui en châk T20 Cricket World Cup semifinal hnuhnung zawk chu vawiin tlai dar 1:30 hian Adelaide Oval-ah India leh England te an inkhel dawn. Team pahnih an ṭha ve ve a, chak tura rinkai zawk an awm lo a, boruak sang ngam zawkin hnehna an chang ang.
Inrintawkna
India-in July thla khan England hi an ramah an tlawh a, T20 match ṭum thum khelin 2-1 in series an la. T20 zawh hian ODI match ṭum thum an khel leh a, 2-1 bawkin series an la bawk.
Rohit Sharma chuan, "England hi an ram ngeia hneh an harsa a, mahse an ramah ngei kan hneh. Hemi avang hian inrintawkna nasa tak kan nei. Chutihrualin T20 cricket-ah chuan engpawh a thleng thei thung," tiin a sawi.
India-in England an hneh ṭum hian tun World Cup hmang ṭha Suryakumar Yadav bawk a che ṭha a, SKY hian innings thum lekah 171 runs a siam a, strike rate pawh 200 chuang a ni.
India captain Rohit Sharma erawh a la che ṭha tawk lo a, Thawhlehni khan training-naah a inhliam. Semifinal-ah erawh Rohit hi a inlan tura ngaih a ni a, England lakah KL Rahul nen bul an ṭan ṭhat a pawimawh dawn.
India dal châk
Khawvelin an hmuh châk chu final-a India leh Pakistan inkhel a ni a, England captain Jos Buttler erawhin thlentir a tum lo. Buttler chuan, "Keini chaun final-a India leh Pakistan te inkhel hi kan hmu châk ve lo. An beiseina tih thamraltir hi kan tum," tiin hnehna chan ngei an tum thu a sawi.
India team chungchang sawi zuiin Buttler chuan, "Team ṭha tak an ni a, khelh an har dawn. Semifinal-a hetiang team ṭha kan hmachhawn tur hi kan phur a, hetiang hun hi infiammi tan chuan a hlu a ni," a ti.
England hi kum 2019 khan ODI World Cup-ah an champion a, champion puitu captain chu Eoin Morgan a ni. Buttler chuan, "Kan khelh dan thlir hian champion thei kan ni a, kan thil tumah kan chiang a ngai. Eoin Morgan pawh vawi tam ka bia a, ka ṭhian ṭha tak a ni," tiin a sawi.
Three Lions buaina erawh player pawimawh Dawid Malan leh Mark Wood hliam vangin an dinhmun a chiang lo a, an dam hman loh chuan Buttler leh a hote tan India dal a har sawt ang.
Ṭhumvawr a pawimawh
T20 cricket hi chu over 20 chauh khelh a ni a, hemi a nih avang hian team ṭha zawk pawh an chak lo fo. Inkhel tidanglamtu pawimawh tak chu ṭhumvawr a ni a, bat hnuhnun a pawimawh ang.
Inkhelhna tur Adelaide Oval hi Australia cricket ground zingah chuan ball sawh hniamna a ni a, batter tan ball vuak a nuam. Chutihrualin India rama pitch te nena khaikhin chuan ball a la sawt sang zawk.
Adelaide Oval-a inkhelh tawhna thlir chuan bat hmasa zawkin chak turin 165 runs tal an siam a pawimawh dawn a, hei pawh hi a tam tawk lo thei bawk.
Inkhel tur chu
India tan KL Rahul a che ṭha leh tawh a, Rohit a chet ṭhat bawk chuan Virat Kohli leh SKY te an awm avangin batting lam chu an ngaihtuahawm loh. Amaherawhchu, Ravindra Jadeja inhliamin nghawng a nei lian a, Jadeja thlaktua ngaih theih Axar Patel leh Deepak Hooda ten beisei an la pha lo.
Hei bakah hian wicket-keeper aṭangin runs an la siam tam tawk lo. Dinesh Karthik-a'n a theihna tak a lantir lo a, Rishabh Pant pawh a khelh chhunah a ropui bik lo. Bowling lamah Bhuvneshwar Kumar, Arshdeep Singh leh Mohammed Shami te tun thleng chuan an la khel ṭha hle.
England pawh hi batting leh bowling lamah an ṭha ve ve. Captain Jos Buttler leh Alex Hales ten bul an ṭan ṭhin a, finisher ṭha Ben Stokes hi hun pawimawhah danglamna a ni leh ṭhin bawk.
All rounder-ah Moeen Ali hi a ṭha ber zinga mi a ni a, Chennai Super Kings a khel lai player hian India player-te a hrechiang. Bowling lamah Wood a dam hman a pawimawh a; Sam Curran, Adil Rashid leh Chris Woakes te hoin India batter te tan harsatna an thlen thei ang.