Mizoramin semifinal an lut

2nd NorthEast Olympic 2022-ah Mizoram chuan nimin khan football inelnaah Assam 6-0 in an hneh a, match khat khelhna lekah semifinal an lut nghal. November 11, Zirtawpni tlai dar 4:30-ah Mizoram hian Manipur nen group hmahruaitu tur an zawng ang.

Meghalaya Football Association Ground-a inkhelah Mizoram tan Joseph Lalvenhima chuan goal li a khung a, K. Lalrosanga leh Rohlupuia ten goal khat ve ve an khung. Mizoram hi Manipur leh Assam nen group khatah an awm a, Manipur hian Assam hi 3-0 a an hneh tawh avangin Assam an tla - Mizoram leh Manipur ten semifinal an lut.

Mizoram team hi coach HC Zarzoliana enkawl a ni a, kum 21 hnuai lam inelna a ni. Mizoram Premier League inelna neih mek a ni nachungin Mizoram hian ISL club reserve a khelte an koh avangin an squad a ṭha a, champion rinkai an ni pha.

Assam lakah hian John Lalruatfela'n goal a veng a, tlar-hnungah Malsawmtluanga, S. Lalhrezuala, Laldanmawia leh Jeremy Zohmingliana te an awm. Defensive midfield-ah Caleb Lalnunhlua a awm a, Aron Vanlalrinchhana leh Samuel K. Vanlalpeka ten tlarhma an thlawp. Goal nawr turin Augustine Lalrochana, Joseph Lalvenhima leh Rohlupuia (Mapuia) te an awm.

Mizoramin bul an ṭan ṭha a, minute 18-naah Lunglei Bazar Veng rawlthar Joseph-a'n penalty aṭangin a khung. Joseph hi ISL club Chennayin reserve-a mi niin Assam lakah a khel ṭha a, minute 25-naah mawi zeta tauh goal lehin goal hmasa pahnihah Cristiano Ronaldo goal khung lawm dan a hmang.

Minute 37-naah Joseph hian 'cool' takin a khung belh leh a, first half-ah 3-0 a ni. Second half-ah Augustine aiah Aizawl FC tana a khelhpui K. Lalrosanga a rawn lut. Inter Village Football-a Ramhlun North tana khel ṭha Rosanga hian minute hnihna lekah goal a rawn khung ve lehnghal.

Assam tlarhnung tan Mizo rawltharte an ṭha mah mah a, Hyderabad Reserve-a awm Hnahthial rawlthar Mapuia'n Mizoram goal ngana a khung. Mizoram an chungnung zel a, first half-a hattrick siamtu Joseph-a'n minute 62-naah a khung belh leh bawk.

Mizoram hian inkhel thunun chhunzawm mah se goal an khung belh tawh lo. Mizoram manager K. Lalenghluna (Maenga) chuan, "Duhthusamin training-na hun kan nei lo a, player kan la inenchhin kual a ngai. Hun tawp lamah goal khung belh lo mah ila kan inkhel leh tur atana training-ah kan ngai a, kan khelh danah kan lawm," tiin Vanglaini a hrilh.

Nimin Inkhel Results
Mizoram 6 - 0 Assam
MIZ : Joseph Lalvenhima 18', 25', 37', 62'; K. Lalrosanga 47'; Rohlupuia 51'

November 11, Zirtawpni
Mizoram 4:30 PM Manipur