Pakistan an chak; Indo-Pak final?

T20 Cricket World Cup semifinal-ah Pakistan chuan New Zealand chu wicket 7-in an hneh a, final an lut. Black Caps an hneh theih nan captain Babar Azam a che ṭha a, India hmachhawn turin Shaheens an inpeih.

Chutihrualin cricket khawvel hmuh châk final-a Pakistan leh India inkhel thleng turin vawiin hian Men in Blue-in England an hneh a ṭul dawn.

A tlem hret
Sydney Cricket Ground-ah Kane Williamson-a'n bat hmasak a thlang a, over 20-ah 152/4 runs an siam. Black Caps hian opener Finn Allen chu run li a siam tihin an chân a, Devon Conway pawhin 21 runs chauh a siam.

Captain Williamson a fimkhur a, dinhmun chhia aṭanga New Zealand hi hruai chhuakin 46 runs a siam. Chutihrualin Williamson strike rate hi 109.2 chauh a ni a, risk a lak har hret avangin target an siam sang tawk lo.

New Zealand tan Daryl Mitchell-a'n thi loin 53 runs a siam a, over 20 chhungin 152 runs an siam. Black Caps target siam a tlem hret a, Pakistan dinhmun a ṭha ta zawk.

Pakistan hun
Black Caps-in final an thlen theih nan bowler-te chet ṭhat an mamawh a, bul an ṭan fuh lo. Wicket keeper Devon Conway chuan Pakistan captain Babar Azam ball vuak a thlauh.

Babar Azam hi a ball hmachhawn hmasa berah thi nghal thei a ni a, a vanneih hmang ṭangkaiin 53 runs hial a siam. Mohammad Rizwan a che ṭha a, 57 runs a siam bawk.

Pakistan opener-ten hna harsa an thawk zo a, Black Caps fielding ṭhat tawk loh an vanneihpui bawk. Mohammad Haris-a'n 30 runs a rawn siam a, a dam tluan tak loh avangin hun tawp lam boruak a sang teuh hle. Over tawp berah run hnih siam a ngai a, Shan Masood-a'n chakna run a vaw chhuak.

Shaheens hi Super 12-ah tla thei dinhmunah an ding a, Netherlands-in South Africa an hneh zarah semifinal an lut. Babar Azam-a hote vanneih vangin semifinal an lut a, tunah erawh thiam vangin final an lut.

Thlirna Tawi
Semifinal - Nimin Inkhel Results
Pakistan bt New Zealand
Pakistan wicket 7-in an chak

New Zealand 152/4
Daryl Mitchell 53 (35)
Kane Williamson 46 (42)
Devon Conway 21 (20)

Shaheen Afridi 24/2
Mohammad Nawaz 12/1
Mohammad Wasim 15/0

Pakistan 153/3
Mohammad Rizwan 57 (43)
Babar Azam 53 (42)
Mohammad Harris 30 (26)

Trent Boult 33/2
Mitchell Santner 26/1
Tim Southee 24/0