Man United tan phuba lakna remchang

Manchester United chuan zanin dar 1:30 hian kar liam taa an hneh loh Aston Villa chu League Cup third round-ah an hmachhawn dawn. Inkhelhna hmun tur hi Old Trafford a nih avangin Erik Ten Hag leh a hote tan phuba lakna remchang a ni ang.

Premier League match hnuhnung ber thlirlet chuan Villa Park-ah Unai Emery hote an khel ṭha hle. Villa hian minute 11 chhung lekin Leon Bailey leh Lucas Digne hmangin hma an hruai a, first half-ah vek United-in siphurh sut ṭhen mah se second half-ah Jacob Ramsey hmangin mualneituin an khung belh.

Emery hnuaia an match hmasa berah Villa-in 3-1 in hnehna an chang a, Spanish manager-in bul a ṭan ṭha tiin a sawi theih. Villa hian fiahna hautak an hmachhawn lehnghal dawn a, Old Trafford-a Man United hneh nawn hi a harsa ang.

Villa tana harsatna belhchhah turin defen-der Jan Bednarek leh midfielder Leander Dendoncker te chu cup-tied vangin an khel thei dawn lo a, hliam vangin Diego Carlos (Achilles) leh Philippe Coutinho (thigh) te an inlan thei lo bawk.

Chutihrualin Old Trafford-ah United player hlui Ashley Young chu inlan thei dinhmunah a ding a, Emery-a'n squad a siksawi hret bawk ang. Dutch manager Erik ten Hag pawhin kartawpa Fulham nena an inkhel tur thlir chuan squad a siksawi hret a rinawm a, chutihrualin Europa League-a a player rem ṭhin dan thlir chuan player ṭha a luhtir a rinawm.

Man United tan hian Jadon Sancho leh Antony te an khel thei dawn em, tih a chiang lo a, Anthony Martial erawh bench aṭanga a rawn luh tawh avangin bul ṭan thei a ni tawh. Tun hnaiah rawlthar Alejandro Garnacho a khel ṭha a, training-na lamah rawlthar Shola Shoretire hmuh tur a awm. Villa hmachhawn turin player naupang zawk pahnih khat an inlan thei bawk.

United tan Premier League champion beisei ngam chi a ni tawh lo a, Europa League nomawi chawi pawh a har dawn. Erik Ten Hag-a'n nomawi chawi a tum a nih chuan League Cup a ngaihthah a thiang lo.