Thlasika FIFA World Cup hmasa ber tur a hnai ta

Kum li dana neih ṭhin khawvela football inelna ngaihhlut ber FIFA World Cup chu November 20 aṭangin Qatar-ah khelh ṭan a ni dawn a, December 18 thleng khelh a ni dawn. World Cup vawi 22-na tur ni mah se thlasika World Cup khelh hmasak ber tur a nih avangin tun ṭum inelna hi a danglam hle.

World Cup chhung hian Europe league lian ho an chawlh a ṭul dawn a, ram inelna lian hi football season kara a tlakzeh avangin inpuahchahna hun pawh a rei lo hret dawn.

A hun a fuh
Inelna hi Asia rama neih tur a nih dawn avangin Mizoram aṭang chuan inkhelh hun pawh duhthusam tiin a sawi theih. Opening match-ah inelna thlengtu Qatar leh Ecuador te November 20, Pathianni zan dar 9:30-ah an inkhel dawn.

Inkhelh hun hi tlai lam dar 3:30-ah te awm bawk mah se inkhel tam zawk hi zan lam 6:30 leh 9:30-ah te a awm dawn. Chutihrualin zanlai dar 12:30-a khelh tur a awm dawn bawk.

Semifinal pahnih hi zan lai dar 12:30-ah ve ve khelh a ni dawn a, final erawh December 18, Pathianni zan dar 8:30-ah Lusail Stadium-ah khelh a ni ang.

Qatar boruak
Thlasika World Cup khelh a nih chhan hi Qatar khaw lum vang a ni a, kum danga inelna neih hun June thlaah chuan khawlum lam hi a san laiin chawhrualin 41.2°C a ni pha a, a vawh lai pawhin chawhrualin 27.7°C a la ni pha tho.

European tan chuan 27.7°C pawh hi a la lum a, inkhelh harsatna hun a la nih phak avangin thlasika inkhelh hun sawn a ṭul phah ta hial. November leh December thlaah chuan 21-26°C vel a ni dawn a, a tawrh theih tawh ang.

Stadium a ṭha
Qatar boruak duhthusam ni lo mah se sum lamah harsatna an neih loh avangin stadium erawh an nei ṭha thung. World Cup hi khawpui pangaah khelh a ni dawn a, stadium pariat hman tur niin stadium tam zawk hi inelna puala sak a ni.

Final khelhna tur Lusail Iconic Stadium-ah hian entu 80,000 a ni a, entu an len tam avangin final khelhna atan pawh hian thlan a ni. Kum 2017 aṭang khan stadium hi sak ṭan a ni a, kum 2021 khan sak zawh a ni a, stadium chhung boruak tih daihna a awm thlap.

Stadium dang Al-Bayt Stadium, Education City Stadium, Stadium 974, Khalifa International Stadium, Al Thumma Stadium leh Al Jacob stadium te pawh hi ṭha tak vek a ni.

Chawimawina hrang hrang
a) Fair Play trophy: Fair Play chawimawina dawng tur tehfung a awm a, chuta point hmu sang ber hnenah Fair Play trophy an hlan ṭhin. Player leh official zawng zawngin medal an dawng vek a, football tihhmasawnna tur dollar 50,000 man hu bungrua an dawng ang.

2018 dawngtu : Spain
b) Golden, Silver leh Bronze Boot: Goal khung tam ber player hnenah golden boot an pe ṭhin. Goal khung zat inang an awm a nih chuan assist tam zawk dah pawimawh a ni ang a, a la inang cheu chuan minute khel tlem zawk chu dah san zawk tur a ni. Goal khung tam pahnihna leh pathumna ten silver leh bronze boot an dawng bawk ang.

2018 dawngtu
Golden Boot Harry Kane, England
(6 goals, 0 assists)
Silver Boot Anotoine Griezmann, France
(4 goals, 2 assists)
Bronze Boot Romelu Lukaku, Belgium
(4 goals, 1 assist)

c) Golden, Silver leh Bronze Ball: World Cup best player thlan ṭhin a ni a, golden ball an hlan ṭhin. Player khel ṭha pahnihna leh pathumna thlan a ni bawk a, silver leh bronze ball pek an ni bawk.

2018 dawngtu
Golden Ball Luka Modric, France
Silver Ball Eden Hazard, Belgium
Bronze Ball Antoine Griezmann, France

d) Golden Glove: Goalkeeper che ṭha ber hnenah Golden Glove pek an ni a, FIFA Technical Study Group-in an thlang ang.

2018 dawngtu Thibaut Courtois, Belgium

e) Young Player: January 1, 2002 leh a hnu lama piang chin player khel ṭha ber hnenah Young Player Award hlan a ni dawn a, FIFA Technical Study Group-in an thlang ang.

2018 dawngtu Kylian Mbappe, France