Bournemouth-in Everton an sawp!

Frank Lampard-a'n insawifiahna tur a nei - Thawhlehni zan khan League Cup third round-ah Everton an mualpho a, Bournemouth lakah 4-1 in an tlawm.

Cherries tan Jamal Lowe leh Junior Stanislas ten goal khat ve ve an khung hnuah, Everton tan Demarai Gray chuan si phurh a sut ṭhen a, beiseina an nei hman.

Mahse, mualneitu tan Emiliano Marcondes leh Jaidon Anthony ten goal khat ve ve an khung leh a, Lampard enkawl Everton an mualpho a, League Cup an mangṭha.

Thawhlehni zanah Premier League club langsar zingah Leicester City an chak bawk a, harsatna nei loin Newport County chu 3-0 in an hneh - Jamie Vardy chuan goal hnih khungin James Justin chuan goal khat a khung bawk.

Hlau lo ve ve!
World Cup hmain league match khat khelh tur a la awm a, Bournemouth boss Gary O'Neil leh Everton manager Lampard ten ṭha taka league khar an duh avangin League Cup-ah an neih ṭhat ber an chhawr lo a, an inzuam tawn!

O'Neil-a'n Leeds United laka 4-3 a tlawm hlim a team aṭangin goalkeeper Mark Travers leh central defender Chris Mepham te chiah bul a ṭan nawntir a, Lampard phei chuan Leicester laka tlawm a team aṭangin pakhatmah bul a ṭantir lo.

Mahse, Bournemouth zawk chu bul ṭan ṭha an ni - minute sarihna leka Lowe-a shot chuan Scottish right back Nathan Patterson-a ke perin goal-ah a lut a, Everton keeper Asmir Begovic-a'n a thlir liam.

Everton-in chance an nei ve zui a, mahse, Tom Davies, James Garner leh Anthony Gordon ten chance ṭha an hlah vek a, Jordan Zemura laka a chet dan avanga Gordon-a'n yellow card chauh a hmu chu a vannei takzet bawk.

A tawpah Bournemouth
First half-ah goal dang a lut lo a, Everton tan beiseina a awm. Mahse, second half ṭan aṭanga minute hnihna lekah Stanislas chuan Merseyside club tlarhnung tihsual zarzoin an goal hnihna a khung leh a, 2-0 a ni.

Lampard-a'n a dinhmun a ṭha lo tih hriain Alex Iwobi, Dwight McNeil leh Gray te chu bench aṭangin a luhtir a, minute 67-naa thutlukna a siam fuh tih lang zuiin Gray-a'n si phurh a rawn sut ṭhen.

Mahse, Everton an che fuh rei thei tak tak lo! Marcondes leh Jaidon Anthony ten goal khat ve ve rawn khung ve lehin, Bournemouth-in hnehna an chang a, Everton an mualpho.

Kum 1995 hnua champion nomawi langsar chawi la nei leh lo Everton fans an lungawi lo a, inkhelh chhung zawngin Lampard duh lohna an au pui - England legend tan league-ah tal an ka hup a ṭul ang.

Inkhel dang
Foxes-in Newport County lakah an neih ṭhat ber thawhchhuahpui lo mah se, Justin, Wout Faes, Boubakary Soumare, Harvey Barnes leh Vardy-ten bul an la ṭan miau avangin League Two club tan an la ṭha lutuk hret!

Newport hian rei tak chu Foxes chelh thei mah se minute 44-naah Justin chuan goal hmahruai a khung a, Vardy-a'n second half-ah goal hnih a khung leh bawk avangin, harsatna nei loin 3-0 in an chak.

Brentford boss Thomas Frank-a'n League Cup-ah champion an tum thu a sawi a, League Two club Gillingham lakah pawh a neih ṭhat a thawhchhuahpui - minute thumna lekah Ivan Toney chuan goal a khung zui.

Zawhna awm chu, Brentford -in goal eng zat tak khung ang maw, tih chu a ni. Mahse, bench aṭanga luhtir Mikael Mandron chuan minute 75-naah Gilli tan si phurh a sut a, penalty-ah 6-5 in League Two club hi an chak zui - kum 26 chhunga a vawi khat nan Carabao Cup fourth round an lut!

League Cup Third Round
November 8, Thawhlehni Zan
Leicester City 3 - 0 Newport County
LEI: James Justin 44'; Jamie Vardy 70', 82'
AFC Bournemouth 4 - 1 Everton
BOU: Jamal Lowe 7'; Junior Stanislas 47'; Emiliano Marcondes 78'; Jaidon Anthony 82'
EVE: Demarai Gray 67'
Burnley 3 - 1 Crawley Town
BUR: Ashley Barnes 24'; Anass Zaroury 79', 90'
CRA: Dominic Telford 22'
Bristol City 1 - 3 Lincoln City
BRI: Tommy Conway 80'
LIN: Matthew Virtue-Thick 6'; Benjamin House 15'; Padhraic O'Connor 49'
Stevenage 1 - 1 Charlton Athletic
STE: Luke Norris 22' (P);
CHA: Chukwuemeka Aneke 87'
*Penalty-ah 5-4 in Charlton Athletic an chak
Milton Keynes Dons 2 - 0 Morecambe
MKD: Warren O'Hora 18'; Matthew Dennis 51'
Brentford 1 - 1 Gillingham
BRE: Ivan Toney 3'
GIL: Mikaël Mandron 75'
*Penalty-ah 6-5 in Gillingham an chak

Nizan Inkhel (Result kan hre hman lo)
West Ham United 1:15 AM Blackburn Rovers
Wolverhampton Wanderers 1:15 AM Leeds United
Nottingham Forest 1:15 AM Tottenham Hotspur
Newcastle United 1:15 AM Crystal Palace
Southampton 1:15 AM Sheffield Wednesday
Arsenal 1:15 AM Brighton & Hove Albion
Liverpool 1:30 AM Derby County
Manchester City 1:30 AM Chelsea

Zanin Inkhel Tur
Manchester United 1:30 AM Aston Villa