Bagan khelmualah NorthEast United

Tun season Indian Super League-ah chak la nei miah lo club pakhat an awm a, an hming chu NorthEast United a ni - league match nga khelh tawhah an tlawm vek a, point nei loin table mawngphah an luah.

Zanin dar 7:30-ah NorthEast United hi an inlan dawn a, an lenchilh tur hi team hausa leh player ṭha ngah ATK Mohun Bagan an ni - a awlsam dawn lo. Chutihrual chuan Kolkata club hi an pawisa sen zat leh, player an neih dan thlir chuan an ropui bik lo.

Bagan hian league match li khel tawhin vawi hnih an chak a, vawi khat tlawmin vawi khat draw an nei - an squad enin hei aia result ṭha zawk nei thei an ni a, chak la nei lo NorthEast laka tlawm chu an duh lo tawp ang.

Mohun Bagan hian Mizo player pakhat chiah an kawl a, kum 19 mi midfielder Lalrinliana Hnamte a ni. Season hmasaa East Bengal tana hming chher rawlthar hian hmun a la chang tam tawk lo a, minute 15 chiah a la inlan.

Bagan-ah hian Paul Pogba unaupa Florentin Pogba pawh minute 28 chiah a la inlan a, hei hian an squad chhahzia a hrilhfiah - French midfielder Hugo Boumous, Finland international Joni Kauko leh Australian forward Dimitri Petratos te ho ven uluk an ṭul ang.

Highlander-ah defender Joe Zoherliana leh Emanuel Lalchhan-chhuaha ten hmun pawimawh a chang phak a, Rochharzela a inlan fo bawk a, R. Laldanmawia erawh tun season-ah hliam vangin a la inlan lo thung.

NorthEast tan boruak sang tak kara an lakluh, Nottingham Forest striker hlui Matt Derbyshire, Ligue 1-a a career tam zawk hmangtu, winger Romain Philippoteaux, Real Sociedad centre back hlui Jon Gaztañaga leh Australian defender Aaron Evans ten an theihna tak tak an pholan a ṭul - an tlawm leh a nih ngat chuan coach Marco Balbul dinhmun a derthawng lehzual ang.