A match tawp berah khel lo Pique an hnawt chhuak

Kar hmasa lawk khan Gerard Pique-a'n inkhelh a chawlhsan tur thu a sawi a, Nou Camp-a a match hnuhnung ber chu a khel thlap tawh - mahse, a chawlh tak tak hmain khualmualah Osasuna an la lenchilh.

Pique hi inlan ta se, Barca jersey nena a inlan hnuhnung ber tur a ni. Mahse, Spanish defender hi bench-ah a ṭhu a, bench-a ṭhu chunga a chet dan a mawi loh avangin red card pek a ni - Barca jersey hain a inlan tawh dawn lo.

Barcelona hi an striker chhuanvawr Robert Lewandowski chu minute 31-naah a yellow card pahnihna avangin hnawhchhuah a ni a, he thutluknaa lungawi lo Pique hian chawlhlawk ruala referee pan zuiin, a ṭawng khum a, red card pek a ni.

Catalan club tana thil lawmawm erawh Osasuna lakah 2-1 in an chak tho a, mualneitu Osasuna hian David Garcia hmangin goal hmahruai an khung a, mahse, Pedri leh Raphinha ten chhangletin, 2-1 in hnehna an chang.

A buai!
Barcelona-in World Cup hmaa an league match hnuhnung ber an khel dawn tih an hre sa a, hnehna an chan chuan La Liga hmahruaitu ni chungin Krismas an hmang thei dawn tih an inhre bawk.

Mahse, minute rukna lekah Catalan club-in goal an chhuah a, García chuan mikhual team hi barakhaihin goal hmahruai a khung. Minute 31-naah Barca buai a zual a, Lewy hnawhchhuah a ni.

Barca striker chhuanvawr hian ball kang lak a tumna lamah amah vengtu Garcia chu a nghawk a, referee-in a vawi hnih nan yellow card a pe a, a hnawt chhuak.

Catalan club-in kim loin an khel zui a, si an phurh sa bawk avangin beiseina a tlem a, Rayo Vallecano laka Real Madrid an tlawm avanga hmahruai chhunzawmna chance an neih chu an bawhpelh mek niin a lang.

A huntêah...
Player kim loin khel mah se Barca an beidawng duh lo. Second half ṭan aṭanga minute thumna lekah Pedri chuan si phurh sutna goal a khung a, Catalan club an phur sawt.

Barca-in an duhtawk mai lo - hun tawp nan minute nga chiah a awm tawh tihah Frenkie de Jong chuan Raphinha tan a siamsak a, World Cup khel tura Brazil squad-a koh hlim Raphinha hian chakna goal ni turin a khung.

Catalan club-in hnehna an chan avangin league match 14-ah point 37 an hmu a, pahnihna Real Madrid chu point ngain an tlansan - thlamuang takin Xavi-a'n World Cup a en thei dawn.

Real Madrid hian zanin dar 2:00-ah World Cup hmaa an league match hnuhnung ber khel turin Cadiz an mikhual dawn a, hnehna chang pawh ni se point hniha Barca phak loin chawlh an hmang ang.