Napoli chak niah Milan an chelh

Serie A hmahruaitu Napoli chuan an dinhmun an sawhnghet zel. Thawhlehni zan inkhelah Naples club hian Empoli 2-0 in an hneh, substitute Hirving Lozano chuan goal a khung bakah assist neiin a team a chak pui.

Inkhel dangah champion lai AC Milan erawh an chak zo lo. Milan hian Cremonese lakah inkhel thunun chungin goal an khung thei lo, 0-0 a an inhnehtawk avangin point hnih an hloh tia sawi theih a ni a, nomawi humhim turin hna a hautak dawn.

Beisei phak bakah season hmang ṭha Luciano Spalletti naute hian ball an chang tam, goal khung erawh an harsat. Giacomo Raspadori leh Victor Osimhen ten an remchang neih an chhawr thei lo, chawlhlawk hmain goal an khung lo.

Bench aṭangin Lozano dah luh a ni a, ani hian inkhel a ti danglam. Minute 69-naah penalty aṭangin goal hmahruai a khung a, hun tawp dawnah Piotr Zielinski khung tur siamsak bawkin, point thum hlu tak a hlawh chhuahpui.

Napoli coach Spalletti chuan, "Ball kan cross hnem a, a sir lam aṭangin na tak takin kan nawr hnem bawk. Mahse, a hmawr bawk kha kan harsat lai tak a ni. Ni dangah chuan kan khung ve mai ṭhin, tum ṭumah erawh kan harsat tlat.

"Amaherawhchu, danglamna thlen beiseiin player kan siksawi a, kan hlawhtling. Inkhel bul ṭantu ṭha tak 11 kan neih ang zat tho hi a pawn lamah kan la nei tih a lang, chu chuan min ti lawm," tiin a sawi.

Inkhel dangah AC Milan-in goal khung tumin vawi 16 ngawt an pet a, target zawnah pawh vawi nga a kal. Mahse, a pawimawh ber goal chhungah a lut tlat lo, point khatah an lawngawi a ngai a, hmahruaitu Napoli an phak lohna chu point riat lai a ni ta.

Milan coach Stefano Pioli chuan, "First half kha chu kan khel ṭha viau, a hnu lam erawh kan nihna ang takin kan khel lo. Tun aia ṭha zawk khan khel thei tur kan ni, point kan hloh avangin insiamṭhat kan ngai tihna a ni," a ti.

World Cup hma an match hnuhnung ber atan Milan hian Pathianni zanah Fiorentina an mikhual ang. Hmahruaitu Napoli hian an khelmualah Udinese an mikhual ve bawk dawn a ni.