Number 1 ni tlang tur Swiatek

Iga Swiatek chuan world number 1 ni chungin kum tawp hun a hmang dawn tih a chiang ta. Poland nula hian WTA Finals aṭangin point a hmuh belh ṭha tawk lo, mahse season tluana a khelh ṭhatna chuan dinhmun duhawm takah a dah.

Women's Tennis Association (WTA) chuan ranking thar a ti chhuak a, number 1 ni lai Swiatek hian point 11085 a hmu. Amah hnaih bertu Ons Jabeur chuan point 5055 a nei thung, an inthlauhna hi a tam tham hle.

Kumin March thla khan, kha tih laia number 1 Ashleigh Barty chuan tennis a chawlhsan thut. Australian nula a chawlh takah chuan number 2 Swiatek hi a chung berah a kaisang a, number 1 a nih hnu hian a la hawi kir leh chhin lo.

Kum 21 mi Swiatek hian kuminah nomawi pariat a chawi, heng zingah hian French Open leh US Open nomawi pawh a tel, a zawnin match 37 chhung tehmeuh chak tluan lai pawh a nei, a vanglai a hmang chiang hle.