Arsenal season a la zo lo Season thar atan chinfel ngai an ngah

Mikel Arteta-a'n beiseina sang tak nen Arsenal a enkawl a, kih hnawk tam tak thian fai chungin Premier League-ah pariatna dinhmun an luah - an thlen chin hi lungawi leh lawm taka sawi chiam tur chu a ni lem lo, hmabak erawh an la nei.

Gunners hian FA Cup final-ah Chelsea an la hmachhawn leh dawn, nomawi an chawi a nih chuan season tharah European football an khel ang. An champion lo a nih chuan Europa League pawh an khel phak dawn lo, player neih sa hum chu sawi loh hming langsar lakluh ringawt pawh a harsa dawn.

Unai Emery, Freddie Ljungberg leh Mikel Arteta te kaihhruaina hnuaiah tluk leh din fawmin season an hmang zo hram. Tuna a lan dan chuan North London club hian siamṭhat leh siamrem ngai lai an ngah hle, sawi vek sen erawh a ni kher lo ang.

Pierre-Emerick Aubameyang-a contract nei lai hi nakkum June thlaa zo tur a ni, an pawt sei dawn lo a nih chuan nipui bazar hi manto deuh hleka an hralh theih hun lai a ni ang, a nih loh chuan man nei loin a duh lam a hawi thei dawn.

Tun season Premier League-a goal 22 khungtu Auba leh club an indawr mek a, inrem tur chuan kar khata a hlawh mek £200,000 (Rs nuai 192 ) chu tih pun ngei a ngaih hmel - pawisa bakah hian contract rei zawng leh club hmasawn tum danin kawng thui takin a hril ngei ang.

Gabon international hi striker hriam leh ṭha tak ni mah se league nomawi a la chawi ngai lo, Europe-ah pawh hlawhtlinna lian a la chang lo. Tun hmain China lamah sum tam tak hlawh tura sawmna a lo hnar tawh a, a inkhelh chhan hi sum ngawr ngawr a ni lo tih chu a hriat.

Arsenal captain hian nomawi chawi a duh a, tuna contract thar a ziah mai loh chhan pawh hi nomawi chawi thei tur club tana khelh a duh vang niin a lang. Barcelona leh Inter Milan ten an ngaihven mek a, tun hnaiah Juventus-in an thlithlai tih sawi a awm tel bawk.

Gunners khelh dan thiam bel sa hian a duh a nih chuan club lian tana khelhna tur a hmu dawn chiang. Chutihrualin North London club hian hlawhtlinna chan an duh a nih chuan Auba hi an chelh a pawimawh, player ṭhain khelh zelna tlaka an ngaih theih nana club tih hmasawn chu an hna pawimawh hmasa a ni.

Arsenal season liam ta kan thlir kir a nih chuan buaina neuh neuh a tam. A langsar tak pakhat chu captain aṭanga paih thlak Granit Xhaka chungchang a ni. Swiss midfielder hi season tir lamah a che fuh tawk lo, club chhuahsan tur anga sawi a awm hman hial.

October thlaa Crystal Palace nen an inkhelh ṭumin Xhaka hi thlak a ni a, khelmual a chhuahsan dawnin anmahni fans ngeiin an au el hial. Fans auh elna a chhang a, mawi lo takin a che zui bawk - captain a nihna hlihsak a ni a, social media lamah club chhuahsan tura nawrna a tam hman hle.

Mahse, Arteta a rawn lan chinah erawh boruak a danglam. Xhaka chungah rinna a nghat ngam, fans nena an inkar boruak ṭha lo a chinfelsak a, season chawhnu lamah chuan Gunners midfielder pawimawh ber a ni leh tawh; captain atana duhtu pawh an tam leh tawh hle - Swiss tlangval buaina chinfel a ni.

Chelsea aṭanga David Luiz an lakluh khan season hnih daih contract a ziak a, season hnuhnung zawk erawh inbiak ṭhat leh tura tih a ni. Brazilian defender hian tihsual neih a ching, hun pawimawh lai taka a phawsawlh leh tlat ṭhin avangin an thlamuanpui lo. 

EPL-a penalty vawi nga a chawi kha season khat chhunga mimal chawi hnem ber record a ni a, season tharah pawh ani bawk hi tlarhnunga an innghahna a nih chuan a la phui dawn chuang lo tihna a ni. Khelmual pawn lama rawlthar beiseiawm William Saliba kaihruai tur erawh chuan a la ṭha phian mai thei tih chauh a ni.