Bayern chak mah se; an lawm a kim lo

Thawhlehni zan Bundesliga inkhelah Bayern Munich chuan an mikhual Werder Bremen chu 6-1 in an sawp a, nuamsa takin hnehna chang mah se an player pawimawh Sadio Mane chu hliam vanga lak chhuah a ni.

Liverpool forward hlui Mane hi a khup hliam vangin minute 15-na lekah thlak a ngai. World Cup a hnai tawh a, a dinhmun a chiang lo. Chutih rualin Bayern assistant coach Dino Toppmoeller chuan Mane hi a ngaihtuah awm lo niin a sawi thung.

Bavarians tan hian Mane inlan rei thei lo mah se buaina a awm lo. Serge Gnabry-a'n hattrick a siam a, player dang pathum Jamal Musiala, Leon Goretzka leh Mathys Tel ten goal khat ṭheuh an khung ve bawk; Eric-Maxim Choupo-Moting chuan penalty a hlah thung a ni.

Bayern coach Julian Nagelsmann chuan, "Mane-a hliam chu X-ray a ni ang, chumi hnuah a hriat theih ang," a ti. Assistant coach Dino Toppmoeller chuan, "A lan dan chuan na tak a ni lo turah kan ngai," tiin a sawi a, a chawlh a ngai rei dawn lo niin a lang.

Mane a hliam tih thuthang a awm rualin, rilruah World Cup a lo lang nghal. Senegal tan Mane hi player pawimawh bik a ni a, kumin tir lam khan a vawi khat nan an ram hi Africa Cup of Nations title a lakpui - inelna lian zawkah sang tak thlen an chak zual dawn.

Senegal hian World Cup an match hmasa ber atan November 21 hian Netherlands an tum dawn. Group A match dangah Qatar leh Ecuador te an hmachhawn chhunzawm bawk ang.