Warriors tan Curry a vul

NBA regular season khelh laiah, team ṭha Golden State Warriors chuan Sacramento Kings lakah 116-113 in an hneh. GSW tan hian an thiampuipa Stephen Curry chuan point 47 a nei a, a team a chakpui.

Curry hian season kal laiah match khata point a hmuh hnem ber ṭum a tawng, point 47 a neih zinga 17 zetin quarter hnuhnung bera a neih niin, hun pawimawh laiah mawhphurhna laiin a hlen chhuak bawk.

Kum 34 mi Curry hian season bul a ṭan fuh hle, match 10 a khelh tawh zinga pariatah chuan point 30 a nei tling vek. A kum tam deuh tawh mah se NBA champion lai tan innghahna tlak a la ni tih a takin a lantir.

American point guard Curry chuan, "Mimal hna thawh a ni lo, kan zavai hian chak ngei ngei duhna thinlung kan nei, chumi rah chhuah chu kan hmu a ni," tiin point nei tam viau mah se a ṭhiante a fak.

Warriors coach Steve Kerr chuan, "Steph hi chu mi danglam bik a ni a, basketball player awm tawh zinga ropui berte zinga mi a ni. Ṭha tak taka khelh a ngah, chung zingah chuan zanin pawh hi a tel," tiin a sawi.

Curry bakah hian point 25 neitu Andrew Wiggins leh Klay Thompson (16 points) te an che ṭha bawk a, hliam leh harsatna dangin a tlak buak a nih loh chuan NBA champion lai hi midang tan hmachhawn an chakawm lo khawp ang.

Inkhel dangah Milwaukee Bucks an chak lo. Bucks hian kum bul an ṭha ṭha em em a, tun season bika an chak loh vawi khatna ni turin Atlanta Hawks chu 117-98 in an ngam lo, an record ṭha tak a tawp hi an ui khawp ang.

Los Angeles Lakers an la che fuh hleithei lo, tun hnai ni thum chhunga a vawi hni nan an tlawm. Lakers hian Utah Jazz chu 139-116 in an ngam lo, season kal laiah vawi riat zet an tlawm ta. LeBron James awmna team tan playoff khel turin insiamṭhat a ngai.