Tlarhnung pawp

Pep Guardiola-a'n Manchester City a enkawl tirh khan tlarhnung a ngai pawimawh a, sum tam tak sengin keeper leh defender a lei khawm. Jurgen Klopp pawhin a hun laia record siam thamin Alisson Becker leh Virgil van Dijk te a lalut a, a hnu lam chu inhrilh nawn a ngai lo.

Tlarhnung hi tun dinhmunah chuan Arsenal buaina langsar a ni. Premier League a sang zual 10 chinah Gunners (48 goals) aia goal chhuah hnem chu Chelsea (54) leh Burnley (50) te chauh an ni. David Luiz leh Shkodran Mustafi awmna tlarhnung a phui lo takzet.

Hector Bellerin hian a vanglai a hman hmain thildang a ngaihtuah nasa lutuk a, hliam a neih bawk avangin a nih tur ang a ni phak lo - Cedric Soares tana hmun pek a sual lo ang. Tharum ngah Sead Kolasinac ai chuan thluak fim Kieran Tierney a rintlak zawk bawk.

Hliam a neih loh chuan Rob Holding-a'n hmun pawimawh a chan a rinawm a, tawnhriat la ngah lo William Saliba chungah mawhphurhna a sang viau thei bawk. Keeper Bernd Leno leh Emiliano Martinez te erawh a ṭha ber ni lo mah se Arsenal neih phak tawka ṭha an ni.

Pierre-Emerick Aubameyang a cham a nih chuan tlarhma lam an ngaihtuah awm loh. Ani thlawp tur leh a thachhawngdawl turin Alexandre Lacazette a awm bawk, rawlthar Eddie Nketiah erawh duhsak a hlawh ang huin a hlauhawm lem lo - League Cup vela chhawr tawk a ni rih.

Arteta-a'n tlarhma hriam lehzual neih a duh a nih chuan Auba a hman thiam a ngai, a striker neih ṭhat ber hi ball cross tur ni loin a laiah goal khung tura a dah a pawimawh. Mual sira zalenna zau tak neia tlan ai chuan a khelh thiam berna hmuna awm chu a duh dan a nih ngei pawh a rinawm.

Kum 31 mi Aubameyang hian Premier League match 85 a khelh aṭangin goal 54 a khung thei a, English football-ah hian ani aia striker hriam an awm bik rih lo. Striker hriam tak nei chunga European football khelh phak loh reng erawh inbihchian ngaihna lai a tam tih a lang.

Granit Xhaka leh Lucas Torreira hi goal nawr ai chuan a venhim lam thawhpui thiam zawk an ni, rawlthar Matteo Guendouzi erawh hmabak nei eng viauin lang mah se khelhna hmun a chan a rinawm tawh lem lo. Xhaka a rintlak a, a theih loh changin Torreira a awm thung ang.

Cesc Fabregas chhuah hnuah Arsenal hian striker tana ball pe thiam bik midfielder an nei leh mai lo, an beisei san Ozil-a'n a hna a tlin viau - tunah erawh chhawr lohin a awm. Joe Willock hi champion player a ni rih lo a, loan hmanga an hawh Dani Ceballos pawhin 'mangan pet' a nei fo!

Gunners player zinga assist ngah ber Nicolas Pepe-a'n season liam ta EPL-ah a ṭhiante khung tur vawi ruk a siamsak. Pound maktaduai 72 zet senga an lakluh hian a man phu tawkin a la khel lo, khaikhin vek chi ni lo mah se Manchester City midfielder Kevin de Bruyne-a'n assist vawi 20 a nei, league pakhata an elpui player an thlau deuh tih erawh a chiang.

Arsenal hian an mahmawh langsar chu striker leh midfield thlunzawm thiam a ni. David Silva leh Kevin De Bruyne ang em ema class sang an lei ve phak lo a nih pawhin 'killer pass' nei thei player an mamawh takzet - a awmzia chu Fabregas ang kha an mamawh.