Mesut Ozil buaina

Chakna leh thiltih theihna a san zawh poh leh mawhphurhna a sang a, lawmman pawh a tam ṭhin - Arsenal chhungkuaah erawh a ni ve lo. Playmaker ṭha chungchuang, midang chunga leng Mesut Ozil chu harsatna lianpui a ni mek.

Germany international hlui hian kar khatah £350,000 (Rs nuai 336) a hlawh mek. Arsenal player hlawh tam ber ni mah se khelmuala thawhhlawk ber a ni si lo. Emery khan a chhawr duh lo, manager lailawk Ljungberg hnuaiah pawh a tlatlum chuang lo.

Arteta a rawn lang a, a hun hmasa lamah chuan Ozil a chhawr. Khelmual chhungah a thiam thil lantirin ngai a awh chho leh mek a, beiseina an neih san lai takin lang lo lamah buaina a awm leh; a bul ṭantu 11 zingah telh a ni ngai ta lo a, squad-ah pawh a tan hmun a awm leh ta lo. Khawsik, hnungzâng na, video games khelh vanga kawng na leh buaina neuh neuh chu Ozil an thlan loh chhan langsar a ni ṭhin. Training erawh a nei ṭha viau a, twitter lamah 'Ka inpeih e' tiin inkhel tura a inpeih thu sawi mah se an hnawl zel si.

Arsenal midfielder inlan ṭhin zingah hian Ozil-a 'class' ang nei pha an awm lo tih chu inhrilh nawn a ngai lo. A bik takin 'final third' vela che tur chuan ani aia thlan tur dang an awm lo ang. Club thuneitu nen an inkar a ni emaw, manager nen an inkar emaw pawh a ni zawk thei - hriat chian theih a ni lo. A pawimawh ber chu Ozil chhawr theih a ni, chawr tlak a nih loh chuan a rang thei anga nawr chhuah a pawimawh. A hlawh leh hmun awhin player dang a dip a, team boruak ṭhat tawk lohzia a lantir avangin tuna a awm dan hi chu hmasawnna daltu a ni. Ṭha taka an chhawr a nih erawh chuan ṭhatpui tham khawp thiamna nei a ni.