Championship Playoff Final lut turin Fulham dinhmun a ṭha

Thawhṭanni zan khan Championship Playoff semifinal first leg hnuhnung zawk khelh a ni a, Fulham-in Cardiff City Stadium-ah mualneitu Cardiff City 2-0 in an hneh a, Scott Parker-a hote final lut turin an dinhmun an ṭha hle. Second leg hi Craven Cottage-ah July 30, Ningani zan hian khelh a ni ang.

Zanin hian Griffin Park-ah Brentford-in Swansea an mikhual dawn. First leg-ah Swans-in an mual Liberty Stadium-ah 1-0 in hnehna an chang. Final hi Wembley Stadium-a khelh tur a ni a, champion team-in season tharah Premier

League an khel ang.

Fulham hi Championship-ah palina an ni a, panganaa awm Cardiff City aiin league-ah point riat zetin hmu tam mah se playoff-ah league-a an point an keng tel tawh loh avangin dinhmun ṭha zawk an awm lo. Team pahnih inhmachhawn hnuhnun ber chu July 10 kha a ni a, Fulham 2-0 in an chak. 

Chutihrualin Cardiff City Stadium-a an intawn hnuhnun berah erawh 1-1 in an inhnehtawk. Semifinal first leg hi Cardiff City Stadium-ah khelh a ni a, mikhual Fulham-in inkhel thununin ball possession pawh 63% daih an nei. Amaherawhchu first half-ah Cardiff-in goal khungna chance ṭha an nei hmasa zawk a, Leandro Bacuna ball pet kawh zet chu Fulham keeper Alex Smithies-a'n dang perin striker Robert Glatzel tlawh luh hmain defender Marek Rodak-a'n a tlawh sawn hman.

First half-ah goal a lut lo a, Fulham tan second half-ah Josh Onomah-a'n goal class bik a khung. Tottenham Hotspur academy chhuak Onomah hian box pawn chiahah ball changin Cardiff City player pathum a bum a, goal hmahruai a khung. Mikhual Fulham-in inkhel thunun chhunzawm mah se goal an khung lawk lo. Injury time-ah Neeskens Kebano-a'n box pawn aṭangin freekick mawi zetin a khung a, Fulham dinhmun ṭhat phahin 2-0 in hnehna an chang.

Season liam ta khan Cardiff City leh Fulham hian Premier League an khel a, 18-na leh 19-na niin season an khar. Premier League-ah hian Slavisa Jokanovic hoin season an ṭan a, beisei ang result an neih loh avangin EPL-a Leicester City champion puitu Claudio Ranieri an lalut s, result an neih ṭhat zui loh avangin Scott Parker chu manager lailawk atan an ruat a, relegate zui mah se England international hlui hi manager atan an nemnghet ta tho.

Scott Parker hnuaiah Fulham-in season ṭha tak an hmang a, playoff khel turin an tling. First leg-ah Fulham 2-0 in an chak a, Premeir League nena an inkarah match hnih chiah a awm tawh. Cardiff City boss Neil Harris chuan, "Fulham-in Wembley Stadium thleng tawh ang maiin an chak an lawm," tiin an khingpuite chu lawm hma hretah a ngai.

Fulham manager Parker chuan, "Neil-a hmuh dan ang hi ka hmuh dan a ni ve lo. Inkhelh a zawh hnuah professional takin ka player-te an khawsa a, a chanve chauh an la zo tih kan hria. Second leg-ah inelna hautak zet kan hmachhawn leh ang," tiin a insawifiah a, chaka an la inngaih loh thu a sawi.

First Leg

July 26, Pathianni zan

Swansea    1 - 0    Brentford

SWA : Andre Ayew 82'

July 27, ThawhṬanni zan

Cardiff City    0 - 2    Fulham

FUL : Josh Onomah 49'; 

   Neeskens Kebano 90+1'

Second Leg

Zanin Inkhel Tur

Brentford    12:15 AM    Swansea

July 30, Ningani zan

Fulham    12:15 AM    Cardiff City