England lakah India an zawr

T20 Cricket World Cup final-ah India leh Pakistan inhmachhawn se tih chu cricket ngainatu tam zawk duh dan a ni a, mahse infiamnaah chuan duhthusam hi a thleng meuh lo. Nimin semifinal-ah England-in wicket 10-in India an sawp a, Rohit Sharma hoten an tum ram an thleng zo ta lo.

Nomawi inchuhna hi November 13, Pathianni tlai dar 1:30 hian Pakistan leh England ten an khel ang. Final-a inhmachhawn tur team pahnih hi Super 12-ah pahnihna ve ve ni mah se semifinal-ah chuan team ṭha zawk an ni.

Adelaide Oval-ah ṭhumvawr a pawimawh a, England an vanneih zawk avangin hna chanve an zo. England captain Jos Buttler-a'n vawm hmasak a thlang a, pitch tharah India batter-ten harsatna an tawk - a chhan chu ball a chet bakah ball a sawt sang hret tlat.

Chutichung chuan India an bat chhe lo a, Virat Kohli-a'n half century a siam bakah Hardik Pandya-a'n ball 33 lekah 63 runs a siam. India hian a tawp an khar ṭhat avangin 168/6 runs an siam a, ball tawp bera Hardik Pandya-a'n four a hlap chhunga a kein wicket a khawih fuh chu a pawi hle.

India bat hun tawp lamah hian pitch a ro ṭan tawh a, bat a nuam tawh. England bat hun a thlen meuh chuan bat a nuam lehzual a, Three Lions opener Jos Buttler leh Alex Hales te an che ṭha hrim hrim bawk.

England opener ten a khat mawi tawkin six leh four an vaw chhuak a, over nga chhoah chak tur a chiang ṭan der. Buttler-a'n 80 runs siam turin ball 49 chauh a mamawh a, Hales-a'n 86 runs siam turin ball 47 chauh a mamawh. England opener-te an che ṭhat thlawt a, India bowler-te an che thei lo - an fielding a chhe bawk.

Over 16 lekah England-in 170 runs an siam a, wicket hloh loin hnehna an chang. World Cup match hmasa bera Pakistan hnehtu India team-in bul ṭan ṭha mah se a tawp an khar ṭha lo a, England lakah dawl zawrin an zawr.