Arsenal, Chelsea leh Spurs an tla!

Premier League hmahruaitu Arsenal, team ṭha Chelsea leh champion chak em em mah se champion thei si lo Tottenham Hotspur te chu League Cup third round paltlang zo loin an tla vek. London club zingah Charlton Athletic chauh League Cup-ah an dam tawh!

Manchester City an tlang, anni hian Graham Potter-a kaihhruai Blues hi 2-0 in an hneh. Liverpool pawhin League One club Derby County hneh turin vanneihna an mamawh, goal khung loa an inhnehtawk hnuah Reds hi penalty shootout hmangin 3-2 in an tlang hram.

Mangṭha Arsenal
Mikel Arteta nauten season bul an ṭan fuh a, an phur vanglai tak pawh a ni. Emirates Stadium-ah Eddie Nketiah hmangin hma an hruai a, player ṭha chhawr mumal lo mah se chak turin an dinhmun a ṭha leh hman tho.

Mahse, Brighton lamin an ti mai mai bik lo. Danny Welbeck-a penalty hmangin si phurh an sut a, chawlhlawk hnuah Kaoru Mitoma leh Tariq Lamptey ten an khung belh bawk, chak tuma player ṭha hmangtu Brighton an chak.

Arteta-a'n Chelsea hnehtu player 11 zinga 10 zet a thlak hlawk a, inelna ngai pawimawh tho mah se Premier League a ngai pawimawh zawk tih a lang. Arteta chuan, "Inkhel nawn leh ni ila, ka player thlan ngai tho ka thlang ang," a ti.

Brighton tan result duhawm a ni. 1978-79 season khan quarterfinal an thleng a, an thlen san ber ṭum a ni. Tun hnaiah a zawnin season thum chhung chu last 16 an thleng ta, kuminah a aia thlen san ngei an tum ang.

Chelsea an tla
Team ṭha an tam tawh a, eng inelna pawh ni se champion a harsain a hlu vek tawh. Chuvangin Pep Guardiola pawhin nomawi hlut zia a hria a, an squad a chah ṭhat bawk avangin Chelsea lakah team ṭha tak a chhawp chhuak thei.

Riyad Mahrez leh Julian Alvarez te goal hmangin Man City hi an chak. League Cup ni mah se pound makatduai 100 man Jach Grealish te an la inlan thei a, midfield laiah pawh Rodri leh Ilkay Gundogan te an la inkawp theih avangin an ṭha hle.

Raheem Sterling-a'n a club hlui lakah danglamna a siam thei lo, manager thar Graham Potter kaihhruaina hnuaiah Chelsea hian team nghet an la din thei lo. City lakah hian an neih ṭhat ve tho an chhawp chhuak a, chak loh hi a na bik ang.

Potter-a naute hian World Cup hma an match hnuhnung ber atan Newcastle United an la hmachhawn leh dawn. Inrinni zana Premier League an khelh tur hi a pawimawh, season tharah Champions League khelh phak leh phak loh hril thei tur zinga mi a ni.