IWL-ah a sang pali tel nghal dawn

All India Football Federation (AIFF) hnuaia League Committee chuan Indian Women’s League (IWL) a team tel zat an tipung dawn a, inelna hnuhnung bera a sang palia awm club pali chu tling nghal turin an rel bawk.

Hemi a nih avang hian nakkuma neih tur IWL-ah hian champion Gokulam Kerala FC, Sethu FC, Kickstart FC leh Sports Odisha te chu an tling nghal. League Committee chairman Lalnghinglova Hmar (Tetea Hmar) chuan, "Kum tina qualifier kan khel a nih chuan league ni loin tournament a ni ang. Tuna kan danah chuan eng ang pawhin season hmang ṭha se IWL-ah an khel dawn tih a chiang lo. Tunah erawh kalphung thar siam kan duh a, kalphung nghet kan duh avangin ruahmanna thar hi kan siam a ni," tiin a sawi.

IWL hi kum 2016 aṭang khan khelh ṭan a ni a, inelna ṭantirh hian team paruk an tel. Kum hnihnaah team pasarihah tihpun niin hemi hnu season thumah team 12-in an khel. Tun season (2022-23) aṭangin team 18-ah tih pun a ni dawn.

Inelna hi hmun khatah chauh khelh a ni ṭhin a, kuminah erawh hmun thumah a khelh a ni tawh ang. Tetea Hmar chuan, "Hmun khat chauha kan khelh chuan round 5-6 chhoah player-ten an ning tawh ṭhin. Thla tehmeuh hmun khata awm hi chu a hrehawm ve bawk a ni," tiin inelna hmun tam zawka khelh chhan a sawifiah. IWL hi ruahman dan chuan hmun thumah khelh a ni dawn a, state pakhatin vawi khat an thleng thei ang.